ប្រធានាធិបតីអ៊ុយក្រែន លោក Volodymyr Zelenskyy បានប្រកាសថា ប្រទេសអ៊ុយក្រែនកំពុងប្រឈមមុខនឹង ស្ថានភាពអាសន្នផ្នែកថាមពល បន្ទាប់ពីរុស្ស៊ីវាយប្រហារលើហេដ្ឋារចនាសម្ព័ន្ធថាមពល បានធ្វើឱ្យផ្ទះរាប់ពាន់ខ្នងគ្មានកំដៅ និងអគ្គិសនី ក្នុងអំឡុងរដូវរងារដ៏ត្រជាក់ខ្លាំង។
ប្រភពពីសារព័ត៌មានAl Jazeera នៅថ្ងៃទី១៥ខែមករាឆ្នាំ២០២៦។
ការប្រកាសនេះកើតឡើង ខណៈសីតុណ្ហភាពនៅរដ្ឋធានីគៀវបានធ្លាក់ចុះដល់ –១៩ អង្សាសេ ដែលធ្វើឱ្យស្ថានភាពរស់នៅរបស់ប្រជាពលរដ្ឋកាន់តែពិបាក។ មន្ត្រីក្រុងបានឲ្យដឹងថា អគារផ្ទះល្វែងរាប់រយនៅតែគ្មានកំដៅ ជិតមួយសប្តាហ៍បន្ទាប់ពីការវាយប្រហារធំមួយកាលពីសប្តាហ៍មុន។
លោក Zelenskyy បានបញ្ជាក់ថា ក្រុមជួសជុល ក្រុមហ៊ុនថាមពល និងសេវាសង្គ្រោះបន្ទាន់ កំពុងធ្វើការមិនឈប់ឈរ ដើម្បីស្តារអគ្គិសនី និងកំដៅឡើងវិញ។ រដ្ឋាភិបាលក៏កំពុងពិចារណាកែសម្រួលវិធានបម្រាមគោចរ និងបង្កើនការនាំចូលអគ្គិសនី ដើម្បីបន្ថយផលប៉ះពាល់លើប្រជាជន៕