ប្រទេសកាណាដានិងចិន បានសម្រេចកិច្ចព្រមព្រៀងពាណិជ្ជកម្មថ្មីមួយ ដើម្បីកាត់បន្ថយពន្ធលើរថយន្តអគ្គិសនី (EV) និងផលិតផលកាណូឡា ក្នុងបំណងស្តារទំនាក់ទំនងសេដ្ឋកិច្ច និងរុះរើរបាំងពាណិជ្ជកម្មរវាងប្រទេសទាំងពីរ។
ប្រភពពីសារព័ត៌មានAl Jazeera នៅថ្ងៃទី១៧ខែមករាឆ្នាំ២០២៦។
កិច្ចព្រមព្រៀងនេះត្រូវបានប្រកាសក្នុងអំឡុងដំណើរទស្សនកិច្ចរបស់នាយករដ្ឋមន្ត្រីកាណាដា លោក Mark Carney ទៅកាន់ទីក្រុងប៉េកាំង ដែលជាការទស្សនកិច្ចលើកដំបូងរបស់នាយករដ្ឋមន្ត្រីកាណាដាទៅចិន ចាប់តាំងពីឆ្នាំ ២០១៧ មក។
តាមកិច្ចព្រមព្រៀងថ្មី កាណាដានឹងអនុញ្ញាតឱ្យមានការនាំចូលរថយន្តអគ្គិសនីចិនរហូតដល់ ៤៩,០០០ គ្រឿង ក្នុងអត្រាពន្ធប្រហែល ៦,១ ភាគរយ ធ្លាក់ចុះយ៉ាងខ្លាំងពីពន្ធ ១០០ ភាគរយ ដែលត្រូវបានដាក់ក្នុងឆ្នាំ ២០២៤ ដោយរដ្ឋាភិបាលមុន។
លោក Carney បាននិយាយថា កិច្ចព្រមព្រៀងនេះនឹងជួយឱ្យកាណាដាអភិវឌ្ឍវិស័យរថយន្តអគ្គិសនីដែលមានសមត្ថភាពប្រកួតប្រជែង តាមរយៈការរៀនពីដៃគូច្នៃប្រឌិត ការចូលដំណើរការខ្សែសង្វាក់ផ្គត់ផ្គង់ និងការទាក់ទាញការវិនិយោគថ្មីៗពីចិន ជាពិសេសក្នុងវិស័យថាមពលស្អាត៕