អគ្គីភ័យដ៏ធំមួយបានឆាបឆេះទីប្រជុំជនក្រីក្រហ្គូរីយ៉ុង (Guryong) នៅជាយក្រុងនៃរដ្ឋធានីសេអ៊ូល ប្រទេសកូរ៉េខាងត្បូង បំផ្លាញផ្ទះសម្បែងជាច្រើនខ្នង និងបង្ខំឱ្យអ្នកស្រុករត់គេចខ្លួន ដើម្បីរកសុវត្ថិភាព។
ប្រភពពីសារព័ត៌មានAl Jazeera នៅថ្ងៃទី១៧ខែមករា។
អាជ្ញាធរបានឱ្យដឹងថា អ្នកពន្លត់អគ្គីភ័យប្រហែល ៣០០ នាក់ និងបុគ្គលិកសង្គ្រោះសរុបជាង ១,២០០ នាក់ បានចូលរួមពន្លត់ភ្លើង ដោយត្រូវការពេលប្រហែល ៦ ម៉ោង ទើបអាចគ្រប់គ្រងបាន។ រហូតមកដល់ពេលនេះ មិនមានសេចក្តីរាយការណ៍អំពីអ្នកស្លាប់ ឬរងរបួសនោះទេ ខណៈក្រុមសង្គ្រោះបន្តស្វែងរកជនរងគ្រោះដែលអាចមាន។
មន្ត្រីពន្លត់អគ្គីភ័យបានបញ្ជាក់ថា មូលហេតុនៃអគ្គីភ័យនៅតែកំពុងស្ថិតក្រោមការស៊ើបអង្កេត។ អ្នកជំនាញបានព្រមានថា តំបន់ហ្គូរីយ៉ុងមានហានិភ័យអគ្គីភ័យខ្ពស់ ដោយសារផ្ទះសម្បែងសាងសង់យ៉ាងចង្អៀត និងប្រើវត្ថុធាតុដើមងាយឆេះ ដែលធ្វើឱ្យភ្លើងរីករាលដាលយ៉ាងឆាប់រហ័ស៕