រថភ្លើងល្បឿនលឿនពីរគ្រឿង បានជួបគ្រោះថ្នាក់ធ្ងន់ធ្ងរ នៅភាគខាងត្បូងប្រទេសអេស្ប៉ាញ កាលពីថ្ងៃអាទិត្យ ទី១៨ ខែមករា ឆ្នាំ២០២៦។
ខណៈរថភ្លើងមួយគ្រឿងធ្លាក់ ចេញពីផ្លូវ ហើយបុកជាមួយរថភ្លើងមួយទៀត ដែលកំពុងមកដល់ បណ្តាលឲ្យមានអ្នកស្លាប់យ៉ាងហោចណាស់ ២១នាក់ និងរងរបួសជាច្រើន។
ប្រភពពីសារព័ត៌មានCNA។
គ្រោះថ្នាក់នេះកើតឡើងនៅជិតទីក្រុង Adamuz ក្នុងខេត្ត Cordoba ចម្ងាយប្រហែល ៣៦០ គីឡូម៉ែត្រពីរដ្ឋធានីម៉ាឌ្រីដ។
អាជ្ញាធរបានឲ្យដឹងថា មានអ្នករងរបួសប្រមាណ ៧៥នាក់ត្រូវបានបញ្ជូនទៅមន្ទីរពេទ្យ ក្នុងនោះ១៥ នាក់ស្ថិតក្នុងស្ថានភាពធ្ងន់ធ្ងរ ហើយចំនួនអ្នកស្លាប់អាចកើនឡើងបន្ថែមទៀត។
ប្រធានរដ្ឋាភិបាលតំបន់ Andalucia លោក Juanma Moreno បាននិយាយថាក្រុមសង្គ្រោះកំពុងប្រើគ្រឿងចក្រធុនធ្ងន់ ដើម្បីយកបំណែករថភ្លើង និងស្វែងរកជនរងគ្រោះបន្ថែម។
តាមរបាយការណ៍ មានអ្នកដំណើរប្រហែល ៤០០ នាក់នៅលើរថភ្លើងទាំងពីរ។ អាជ្ញាធរដឹកជញ្ជូនអេស្ប៉ាញបានចាប់ផ្តើមស៊ើបអង្កេត ដើម្បីកំណត់មូលហេតុនៃការធ្លាក់ផ្លូវ ដែលត្រូវបានចាត់ទុកថាចម្លែកព្រោះកើតឡើងលើផ្លូវត្រង់មួយដែលទើបត្រូវបានជួសជុលថ្មី៕