រដ្ឋមន្ត្រីការបរទេសអាមេរិក លោក ម៉ាកូ រូប៊ីអូ បានជំរុញឱ្យប្រទេសសមាជិកG20ពង្រឹងកិច្ចសហប្រតិបត្តិការផ្នែកសេដ្ឋកិច្ច និងរួមគ្នាដោះស្រាយបញ្ហាប្រឈមដែលប្រទេសនានាកំពុងជួបប្រទះ។
ប្រភពពីសារព័ត៌មានAnadolu Agency។
ក្នុងពិធីទទួលស្វាគមន៍រដ្ឋមន្ត្រីការបរទេសនៃប្រទេសសមាជិក G20 នៅទីក្រុងអាត្លង់តា សហរដ្ឋអាមេរិក កាលពីថ្ងៃសុក្រ លោក រូប៊ីអូ បានលើកឡើងថា ទោះបីប្រទេសនីមួយៗមានផលប្រយោជន៍ជាតិខុសៗគ្នាក៏ដោយ ក៏គួរតែស្វែងរកវិធីសហការគ្នា ដើម្បីកសាងអនាគតសេដ្ឋកិច្ចពិភពលោកឱ្យកាន់តែរឹងមាំ។
លោកបានបញ្ជាក់ថា រដ្ឋបាលប្រធានាធិបតី ដូណាល់ ត្រាំ ចង់ឱ្យក្រុម G20 ផ្តោតលើបេសកកម្មស្នូលផ្នែកសេដ្ឋកិច្ច និងសម្រេចបានលទ្ធផលជាក់ស្តែងសម្រាប់ប្រទេសសមាជិក។
កិច្ចពិភាក្សាក្នុងក្របខ័ណ្ឌ G20 នៅឆ្នាំនេះ បានផ្តោតលើវិស័យពាណិជ្ជកម្ម គោលនយោបាយសារពើពន្ធ និងរូបិយវត្ថុ បច្ចេកវិទ្យាថ្មីៗ និងថាមពល។ ជាមួយគ្នានេះ លោកក៏បានស្វាគមន៍ការចូលរួមរបស់ប្រទេសប៉ូឡូញក្នុងដំណើរការ G20 ឆ្នាំនេះផងដែរ។
កិច្ចប្រជុំរដ្ឋមន្ត្រីការបរទេសរយៈពេលពីរថ្ងៃនេះ នឹងត្រូវបន្តដោយកិច្ចប្រជុំកំពូលមេដឹកនាំ G20 ដែលគ្រោងធ្វើឡើងនៅថ្ងៃទី១៤ និង១៥ ខែធ្នូ ខាងមុខ នៅទីក្រុងម៉ៃអាមី រដ្ឋផ្លរីដា សហរដ្ឋអាមេរិក៕
