រអិលបាក់ដីកាលពីដើមសប្តាហ៍នេះ បណ្តាលឲ្យអណ្តូងរ៉ែជាច្រើននៅតំបន់ Rubaya ភាគខាងកើតប្រទេសកុងហ្គោ បាក់រលំ សម្លាប់មនុស្សយ៉ាងហោចណាស់ ២០០ នាក់ ខណៈមនុស្សជាច្រើនទៀតរងរបួស។
អាជ្ញាធរខេត្ត North Kivu ដែលត្រូវបានតែងតាំងដោយក្រុមឧទ្ទាម M23 បានឲ្យដឹងថា គ្រោះមហន្តរាយនេះកើតឡើងនៅអណ្តូងរ៉ែ coltan មួយ ក្រោយមានភ្លៀងធ្លាក់ខ្លាំង។ ជនរងគ្រោះមួយចំនួននៅតែជាប់ក្នុងភក់ និងមិនទាន់ត្រូវបានសង្គ្រោះនៅឡើយ ខណៈអ្នករងរបួសត្រូវបានបញ្ជូនទៅមណ្ឌលសុខភាពក្នុងតំបន់ និងរំពឹងនឹងផ្ទេរទៅកាន់ទីក្រុងហ្គូម៉ា។
អាជ្ញាធរបានបញ្ឈប់ការជីកយករ៉ែជាបណ្តោះអាសន្ន និងបញ្ជាឲ្យផ្លាស់ទីប្រជាពលរដ្ឋដែលរស់នៅជិតអណ្តូងរ៉ែ។ រដ្ឋាភិបាលកុងហ្គោបានសម្តែងការសោកស្តាយ និងចោទប្រកាន់ក្រុមឧទ្ទាមថា កេងប្រវ័ញ្ចធនធានធម្មជាតិដោយខុសច្បាប់ និងគ្មានសុវត្ថិភាព៕