(កណ្ដាល)៖ ស្របពេលមជ្ឈដ្ឋានខាងក្រៅ រួមនិងអាជ្ញាធរស្រុកល្វាឯម កំពុងផ្ទុះការរិៈគន់ដេញដោលគ្នា..!!។
ថាតើមន្ត្រីរូបណា ដែលទទួលផលប្រយោជន៍ពីល្បែងឆ្នោតកន្ទុយលេខវៀតណាម និងលួចប្រាប់ឱ្យមេឆ្នោតរួមនិងបុគ្គលិករត់គេចខ្លួនមុន សមត្ថកិច្ចទៅដល់..?។
*បែរជាលោកអធិការស្រុកល្វាឯម
និយាយធ្វើព្រងើយថា ទៅចាប់មេឆ្នោតវៀតណាមធ្វើអី នាំតែខាតលុយរដ្ឋ..!។
*ជុំវិញរឿងនេះលោក លីវ វណ្ណថេង អភិបាលស្រុកល្វាឯម បានដាក់បទបញ្ជាម៉ឺងម៉ាត់និងសម្ងាត់បំផុត!។
ក្នុងការបង្ក្រាប”ស្នាក់ការល្បែងឆ្នោតកន្ទុយលេខវៀតណាម”ត្រង់ចំណុចភូមិកោះរះលើ ឃុំកោះរះ ស្រុកល្វាឯម ខេត្តកណ្តាល
ដែលនឹងត្រូវអនុវត្តនៅម៉ោង៥ល្ងាចថ្ងៃទី២៨.០១.២០២៦ ដោយបង្កប់កម្លាំងស្លៀកពាក់ស៊ីវិលចាំឃ្លាំមើលទៀតផង…!!។
*បើតាមលោក លីវ វណ្ណថេង ផែនការបង្ក្រាបនេះជារឿងសម្ងាត់និងមានរយៈពេលខ្លីបំផុត..!!។
ពោលគឺរូបលោក បានដាក់បទបញ្ជានៅថ្ងៃទី២៧.០១.២០២៦ នឹងឱ្យចុះចាប់នៅល្ងាចថ្ងៃទី២៨.០១.២០២៦ ហើយបទបញ្ជានិងផែនការនេះ គឺមានតែរូបលោកអ្នកបញ្ជា និងអ្នកទទួលបញ្ជាផ្ទាល់ប៉ុណ្ណោះ ដែលដឹងអំពីផែនការនិងគម្រោង.!!។
ប៉ុន្តែអ្វីដែលនឹកស្មានមិនដល់ និងសោកស្ដាយបំផុតនោះ! គឺផែនការដ៏សម្ងាត់មួយនេះ.បែរជាធ្លាយនិងដឹងដល់ក្រុមឆ្នោតវៀតណាម ហើយក្រុមឆ្នោតវៀតណាម ក៏បានចល័តចេញ ពីស្នាក់ការខាងលើ នៅរសៀលថ្ងៃទី២៨.០១.២០២៦ មុនកម្លាំងចុះទៅចាប់..!។
*ពាក់ព័ន្ធនិងប្រតិបត្តិការបង្ក្រាប ដឹងដល់ក្រុមជនល្មើសល្បែងឆ្នោតវៀតណាមនេះដែរ.លោកនាយប៉ុស្តិ៍នគរបាលរដ្ឋបាលឃុំកោះរះ និងលោកអធិការស្រុកល្វាឯម និយាយផ្ទុយគ្នា…!!។
*ជាក់ស្តែង នៅព្រឹកថ្ងៃទី០១.០២.២០២៦ លោក នង លីកា នាយប៉ុស្តិ៍នគរបាលរដ្ឋបាលឃុំកោះរះ
បានថ្លែងប្រាប់”ដើមរាំង”ថា ពីមុនពិតជាមានក្រុមល្បែងឆ្នោតវៀតណាម ជួលផ្ទះត្រង់ចំណុចខាងលើ ប្រាកដមែន!។
ប៉ុន្ដែពួកគាត់បានឈប់ជួលតាំងពីចុងខែធ្នូ ឆ្នាំ២០២៥មកម្ល៉េះ..!។
ស្របពេលដែល លោកនាយប៉ុស្តិ៍ អះអាងថា ក្រុមល្បែងឈប់ជួលតាំងពីខែធ្នូ.ឆ្នាំ២០២៥ ស្រាប់តែលោក មួង រដ្ឋា អធិការស្រុកល្វាឯមបានថ្លែងទទួលស្គាល់ថា ក្រុមឆ្នោតវៀតណាម ពិតជាដឹងអំពីផែនការបង្ក្រាប និងរត់ចេញពីស្នាក់ការ នៅថ្ងៃទី២៨.០១.២០២៦ មុនពេលសមត្ថកិច្ចទៅដល់ប្រាកដមែន.!។
-ចំពោះសំណួរថា តើផែនការសម្ងាត់នេះ អាចមានសមត្ថកិច្ចលួចខលប្រាប់ក្រុមល្បែងដែរឬទេ..?។
+ត្រង់ចំណុចនេះលោក មួង រដ្ឋា បានឆ្លើយថា តើនរណាទៅដឹង បើវាដឹងមុនអញ្ចឹង.!បើគេធ្វើសមត្ថកិច្ច គេចាំបាច់តេប្រាប់ឱ្យរត់ធ្វើអី..?។
ទន្ទឹមនិងនោះលោក មួង រដ្ឋា ក៏បានសួរត្រឡប់មកកាន់”ដើមរាំង”វិញថា តើបងឯងគិតថា ពួកវានុងសត្វឬក៏មនុស្ស បើវាជាមនុស្ស វាដឹងដូចដែលយើងដែរហ្នឹង..!។
លោក មួង រដ្ឋា បន្តថា បើគោលការ គេឱ្យបង្ក្រាប គឺវាឈប់ហ្នឹងហើយ ចុះបើវាឈប់ហើយ ចាំបាច់ទៅចាប់វាមកដាក់គុកធ្វើអី..??។
លោកអធិការបន្ថែមថា បើចាប់ពួកវាដាក់គុក គឺខាតលុយរដ្ឋច្រើនណាស់.ម្យ៉ាងវិញទៀតបើចាប់ពួកវាដាក់គុក តើបាននរណាចិញ្ចឹមប្រពន្ធកូនរបស់ពួកវា.!។
-ចំពោះសំណួរថា រឿងសម្ងាត់ដែលដឹងត្រឹមអ្នកបញ្ជានិងអ្នកទទួលបញ្ជា.ហេតុអ្វីធ្លាយដល់ជនទី៣ ឬក្រុមល្បែង..?។
+លោក មួង រដ្ឋា បញ្ជាក់ថា លើលោកនេះគ្មានអ្វីជាអាថ៌កំបាំងនោះទេ យើងដឹង.គេក៏ដឹងដូចគ្នា…!។
*ការលើកឡើងរបស់លោក មួង រដ្ឋា នៅពេលនេះ សរបញ្ជាក់ឱ្យឃើញថា លោក មួង រដ្ឋា កំពុងអាណិតអាសូរចំពោះមេឆ្នោតវៀតណាមធំៗ ដែលមានបុគ្គលិក និងមេកញ្ច្រែងឆ្នោតជាច្រើននាក់ និងស៊ីសងលុយរាប់សិបលានរៀលក្នុង១ថ្ងៃៗ..!។
ប៉ុន្ដែ សម្រាប់កូនកញ្ច្រែងឆ្នោតវៀតណាម ដែលដើរកត់ឆ្នោត តាមកន្ទុយម៉ូតូវិញ គឺលោកអធិការស្រុកល្វាឯម ចាប់ដោយគ្មានមានការយោគយល់ឡើយ..!។
ជាក់ស្តែង កាលពីថ្ងៃទី២១ ខែមករា ឆ្នាំ២០២៦ កម្លាំងរបស់លោក មួង រដ្ឋា បានចាប់ខ្លួនស្ដ្រីជាកូនកញ្ច្រែងដើរកត់ឆ្នោតម្នាក់ឈ្មោះ ហេង អេង អាយុ៥០ឆ្នាំ ត្រង់ចំណុចភូមិព្រែករៃ ឃុំព្រែករៃ ស្រុកល្វាឯម ចាត់ការតាមច្បាប់តែម្ដង..!។
ការចាប់កូនកញ្ច្រែង ដើរកត់ឆ្នោតកំប៉ិកកំប៉ុកតាមភូមិ/ ដោយមិនចាប់មេឆ្នោតវៀតណាមបែបនេះ!!។
ត្រូវគេសង្ស័យថា ជាយុទ្ធសាស្ត្រវ៉ៃស្មៅបង្អើលពស់ កៀងត្រីបញ្ចូលស៊ង-ក្នុងបំណងបំបាក់ស្មារតី អ្នកលក់ឆ្នោតតូចតាចឱ្យភ័យខ្លាច
នឹងងាកមកលក់ឆ្នោតឱ្យក្រុមហ៊ុនធំ ដែលមានស្នាក់ការត្រង់ចំណុចខាងលើ..!។
*គួរំលឹកថា កាលពីថ្ងៃទី២៣.០១.២០២៦ សមត្ថកិច្ចស្រុកខ្សាច់កណ្ដាល បានចុះបង្ក្រាបទីតាំងផ្ទះជួលស្នាក់ការល្បែងឆ្នោតវៀតណាម នៅភូមិព្រែកថ្មី ឃុំជ័យធំ ស្រុកខ្សាច់កណ្ដាល
ដោយចាប់បានម៉ូតូបុគ្គលិកឆ្នោតចំនួន២គ្រឿង យកទៅរក្សាទុក.!!។
បន្ទាប់មកនៅថ្ងៃទី២៦.០១.២០២៦ ផ្ទះជួលស្នាក់ការឆ្នោតវៀតណាម ប្រចាំតំបន់ខ្សាច់កណ្ដាល ត្រង់ចំណុចខាងជើងស្ពានព្រែកគង់វ៉ាន់ ក្នុងភូមិអញ្ជែងលើ ឃុំពុកឬស្សី ស្រុកខ្សាច់កណ្ដាល
ក៏ត្រូវបានបិទទ្វារលែងស្នាក់នៅផងដែរ..!។
ខណៈប្រធានតំបន់ឆ្នោតវៀតណាមប្រចាំស្រុកខ្សាច់កណ្ដាល រួមនិងបុគ្គលិកបានរត់គេចអស់ មុនសមត្ថកិច្ចចុះបង្ក្រាប..!!។
រហូតដល់រសៀលថ្ងៃទី២៨.០១.២០២៦ ប្រធានតំបន់ឆ្នោតវៀតណាម ប្រចាំស្រុកល្វាឯម រួមនិងបុគ្គលិកជាច្រើននាក់ ក៏បានរត់គេចពីស្នាក់ការនៅភូមិកោះរះលើ ឃុំកោះរះ ស្រុកល្វាឯមទៀតផង មុនសមត្ថកិច្ចទៅដល់.!។
*ជុំវិញរឿងនេះ ប្រជាពលរដ្ឋដែលមានប្ដីឬប្រពន្ធ ជាអ្នកញៀនល្បែងស៊ីសង”ឆ្នោតកន្ទុយលេខវៀតណាម”សុំស្នើយ៉ាងទទូចដល់ឯកឧត្ដម គួច ចំរើន អភិបាលខេត្តកណ្តាល ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា-មេត្តាចាត់វិធានការបង្ក្រាបល្បែងស៊ីសង”ឆ្នោតកន្ទុយលេខវៀតណាម”ក្នុងភូមិសាស្ត្រខេត្តកណ្តាល ដោយក្ដីអនុគ្រោះ និងសុំចាត់វិធានការស្រាវជ្រាវវែកមុខ ថាតើសមត្ថកិច្ចរូបណា ដែលទទួលប្រយោជន៍ពីល្បែង និងលួចផ្ដល់ដំណឹង”អំពីផែនការបង្ក្រាប”ដល់ក្រុមល្បែងឆ្នោតវៀតណាមនៅស្រុកល្វាឯម បណ្ដាលឱ្យការបង្ក្រាបត្រូវបរាជ័យយ៉ាងអាម៉ាស់ កាលពីល្ងាចថ្ងៃទី២៨.០១.២០២៦៕