សត្វអ៊ីហ្គួណាជាច្រើននៅរដ្ឋផ្លរីដា បានធ្លាក់ពីលើដើមឈើ បន្ទាប់ពីសីតុណ្ហភាពត្រជាក់ខ្លាំងធ្វើឲ្យវាស្រឡាំងកាំង ខណៈរលកអាកាសធាតុត្រជាក់ពីតំបន់អាកទិក កំពុងវាយប្រហារតំបន់ភាគខាងត្បូងសហរដ្ឋអាមេរិក។
ប្រភពពីសារព័ត៌មាន AFP នៅថ្ងៃទី២ខែកុម្ភៈ។
អាកាសធាតុត្រជាក់ខ្លាំងបាននាំឲ្យមានព្រិលធ្លាក់យ៉ាងខ្លាំងនៅរដ្ឋជាច្រើន ដោយព្រិលកម្រាស់ជិតកន្លះម៉ែត្រ នៅតំបន់ខ្លះៗ និងខ្យល់បក់ខ្លាំង ដែលបង្កការរំខានដល់ចរាចរណ៍ និងសុវត្ថិភាពសាធារណៈ។
រដ្ឋ North Carolina ដែលជាទូទៅកម្រមានព្រិលធ្លាក់ បានរាយការណ៍អំពីកម្រិតព្រិលធ្លាក់ខ្ពស់ជាងធម្មតា ដោយទីក្រុង Lexington មានព្រិលធ្លាក់ប្រហែល ៤០ សង់ទីម៉ែត្រ ខណៈតំបន់ Faust នៅភ្នំ Walnut មានព្រិលធ្លាក់ដល់ ៥៦ សង់ទីម៉ែត្រ។
អាជ្ញាធរបានព្រមានប្រជាពលរដ្ឋឲ្យប្រុងប្រយ័ត្នខ្ពស់ ក្នុងការធ្វើដំណើរ និងការរស់នៅប្រចាំថ្ងៃ ខណៈស្ថានភាពអាកាសធាតុត្រជាក់ខ្លាំងនេះនៅតែបន្តប៉ះពាល់ដល់តំបន់ភាគខាងត្បូង និងភាគកណ្តាលសហរដ្ឋអាមេរិក៕