(កណ្តាល)៖ បើគិតត្រឹមថ្ងៃទី២៣.០២.២០២៦ ពុំទាន់មានការដោះលែងជនជាប់ចោទឈ្មោះ ឆេង ស្រីរ័ត្ន ហៅ Love Riya នោះឡើយ។
*នេះបើយោងតាមការបញ្ជាក់ពីលោក ខា ដែនណា ព្រះរាជអាជ្ញារងនិងជាអ្នកនាំពាក្យ អយ្យការអមសាលាដំបូងខេត្តកណ្ដាល ដែលបានថ្លែងប្រាប់”ដើមរាំង”នៅរសៀលថ្ងៃទី២៣.០២.២០២៦។
លោក ខា ដែនណា អះអាងថា បច្ចុប្បន្នជនជាប់ចោទឈ្មោះ ឆេង ស្រីរ័ត្ន ហៅ Love Riya ស្ថិតក្នុងការឃុំខ្លួននៅពន្ធនាគារខេត្តកណ្ដាល។
*សូមជម្រាបថា ជនជាប់ចោទឈ្មោះ ឆេង ស្រីរ័ត្ន ហៅ Love Riya ជាអ្នករកស៊ីអនឡាញលក់ឡេដ៏ល្បីឈ្មោះនៅកម្ពុជា ត្រូវបានសមត្ថកិច្ចចាប់ខ្លួន កាលពីថ្ងៃទី១៤ ខែសីហា ឆ្នាំ២០២៥ រួចបញ្ជូនមកកាន់តុលាការ។
ទន្ទឹមនិងនោះ នៅថ្ងៃទី១៥ ខែសីហា ឆ្នាំ២០២៥ សាលាដំបូងខេត្តកណ្ដាល ក៏បានសម្រេចឃុំខ្លួន ជនជាប់ចោទឈ្មោះ ឆេង ស្រីរ័ត្ន ដាក់ពន្ធនាគារជាបណ្ដោះអាសន្ន ពីបទ៖ ញុះញង់ឱ្យមានការរើសអើង និងធ្វើឱ្យខូចទឹកចិត្តកងទ័ព ដែលបានប្រព្រឹត្តនៅលើបណ្ដាញសង្គម កាលពីថ្ងៃទី៦ និងទី១៣ ខែសីហា ឆ្នាំ២០២៥។
តាមមាត្រា៤៧២ ការធ្វើឱ្យខូចទឹកចិត្តកងទ័ព ត្រូវផ្ដន្ទាទោសដាក់ពន្ធនាគារ ២ឆ្នាំ ទៅ៥ឆ្នាំ និងត្រូវពិន័យជាប្រាក់ពីបួនលានរៀន ដល់ដប់លានរៀល។
មាត្រា ៤៩៦ បទញុះញង់ឱ្យមានការរើសអើង ត្រូវផ្ដន្ទាទោសដាក់ពន្ធនាគារពី១ឆ្នាំ ដល់៣ឆ្នាំ និងត្រូវពិន័យជាប្រាក់ពីពីរលានរៀល ទៅប្រាំមួយលាន ប្រសិនបើការញុះញង់នេះ គ្មានប្រសិទ្ធិភាពទេ។
ទាក់ទិនរឿងនេះ កាលពីថ្ងៃទី៦ ខែសីហា ឆ្នាំ២០២៥ ជនជាប់ចោទខាងលើ បានប្រើប្រាស់គណនីតិកតុក ឈ្មោះលោកជំទាវឧកញ៉ា ឆេង ស្រីរ័ត្ន loverya999 ដោយបង្ហោះវីដេអូ បញ្ចូលសំឡេង ដែលមានខ្លឹមសារថា៖ ក្នុងនាមខ្លួនជាប្រជាពលរដ្ឋខ្មែរមួយរូប ខ្លួនបានបំពេញកិច្ចការជូនជាតិតាំងពីមិនទាន់កើតហេតុកើតឡើង មានវត្តមានរូបខ្លួន ទើបព្រះមាតាបិតាគាត់យាងចេញទៅការពារ ហើយក៏មានការប្រយទ្ធផ្លូវក្នុងបានមុនរួចជាស្រេច។
លុះដល់ថ្ងៃទី១៣ ខែសីហា ឆ្នាំ២០២៥ ជនជាប់ចោទខាងលើ បានប្រើប្រាស់គណនីហ្វេសប៊ុកផ្លូវការរបស់ខ្លួនឈ្មោះ Love Riya ផ្សាយផ្ទាល់ នឹងនិយាយថា៖ «ខ្លួនយកមកលក់បាន ខ្លួននៅតែយកមកលក់ ឈប់ប្រើរបស់ផ្ទះលេខ២ គឺខ្លួនអត់ខ្វល់ទេ»។
បន្ទាប់ពីការបង្ហោះវីដេអូទាំង២ខាងលើនេះរួចមក បានបង្កឱ្យសាធាណជន អ្នកនិយមលេងបណ្ដាញសង្គម បង្ហាញការមិនពេញចិត្ត និងរិះគន់ជាខ្លាំង។
លុះដល់ថ្ងៃទី១៤ ខែសីហា ឆ្នាំ២០២៥ កម្លាំងសមត្ថកិច្ចស្នងការនគរបានខេត្តកណ្ដាល បានចុះឃាត់ខ្លួនជនខាងលើតែម្ដង។
រហូតដល់ថ្ងៃទី២២ និងទី២៣ ខែកុម្ភៈ ឆ្នាំ២០២៦ ស្រាប់តែល្បីនៅលើបណ្ដាញសង្គមថា អ្នកនាង ឆេង ស្រីរ័ត្ន ហៅ Love Riya ត្រូវបានដោះលែងវិញហើយ។
ជាមួយគ្នានេះ មហាជនជាច្រើន បានសម្ដែងការអាណិតអាសូរចំពោះ អ្នកនាង ឆេង ស្រីរ័ត្ន ហៅ Love Riya និងស្នើសុំឱ្យមានការដោះលែង ខណៈនាងមានជំងឺប្រចាំកាយនិងមានផ្ទៃពោះទៀតផង៕