ក្រសួងយុត្តិធម៌អាមេរិក បានឲ្យដឹងថាលោកស្រី Eileen Wang អតីតអភិបាលក្រុងArcadiaនៅរដ្ឋកាលីហ្វ័រញ៉ា បានយល់ព្រមសារភាពកំហុសពីបទធ្វើសកម្មភាពជាភ្នាក់ងារខុសច្បាប់ឲ្យរដ្ឋាភិបាលចិន ចន្លោះឆ្នាំ២០២០ដល់២០២២។
ប្រភពពីសារព័ត៌មានAl Jazeera នៅថ្ងៃទី១២ខែឧសភា។
អាជ្ញាធរអាមេរិកនិយាយថា លោកស្រីបានផ្សព្វផ្សាយខ្លឹមសារគាំទ្រចិន តាមការស្នើសុំរបស់មន្ត្រីចិន តាមរយៈគេហទំព័រUS News Center។
ព្រះរាជអាជ្ញាបានបញ្ជាក់ថា លោកស្រីមិនបានជូនដំណឹងដល់រដ្ឋាភិបាលអាមេរិកថា កំពុងធ្វើការជំនួសឲ្យចិននោះទេ។ ក្នុងចំណោមខ្លឹមសារដែលបានផ្សព្វផ្សាយ មានអត្ថបទបដិសេធការចោទប្រកាន់ថា ចិនបានប្រព្រឹត្តអំពើប្រល័យពូជសាសន៍លើជនជាតិ Uighur នៅតំបន់ Xinjiang។
លោកស្រី Wang បានលាលែងពីតំណែងជាអភិបាលក្រុង ហើយអាចប្រឈមមុខនឹងទោសជាប់ពន្ធនាគាររហូតដល់ ១០ ឆ្នាំ៕