(ព្រៃវែង)៖ មានការអះអាងថា ឈ្មួញខ្នាតធំកំពុងរត់ពន្ធទំនិញដោយសម្រុកដឹកជញ្ជូន”ខោអាវ”ពីវៀតណាម ចូលមកកម្ពុជា តាមច្រកទ្វារព្រំដែនអន្តរជាតិកោះរកា ស្រុកពាមជរ ខេត្តព្រៃវែង យ៉ាងគគ្រឹកគគ្រេងបំផុត ដែលបង់ពន្ធមិនគ្រប់និងផ្ទុកលើសទម្ងន់..!។
ពោលគឺ រថយន្តដឹក”ខោអាវ”១គ្រឿងៗផ្ទុកចាប់ពី២០ទៅ២២តោនឯណោះ.បែរជាគយវ៉ៃពន្ធនាំចូលត្រឹមតែជាង៣តោន!។
*ករណីនេះមន្ត្រីគយព្រំដែនថ្លែងថា មកមើលចុះ.!!។
*ជុំវិញរឿងរ៉ាវខាងលើប្រភពបានបញ្ជាក់ប្រាប់”ដើមរាំង”ថា រាល់ថ្ងៃនេះ ឈ្មួញបានប្រើប្រាស់រថយន្តកូរ៉េចំណុះ២តោនកន្លះ.ទៅ៣តោនកន្លះកែច្នៃធ្វើជាមធ្យោបាយដឹកជញ្ជូនដើម្បីផ្ទុកទម្ងន់បានច្រើន.!!។
ជាក់ស្តែងៈ រថយន្តកូរ៉េពណ៌ស.ពាក់ស្លាកលេខ កំពង់ចាម.3A.4591 តែងតែដឹកជញ្ជូន”ខោអាវ”ពីវៀតណាម ចូលមកកម្ពុជា តាមច្រកទ្វារព្រំដែនអន្តរជាតិកោះរកា ជាប្រចាំដោយ១ជើងៗផ្ទុក”ខោអាវ”ចាប់ពី២០តោនទៅ២២តោនឯណោះ!។
ប៉ុន្តែ ការិយាល័យគយនិងរដ្ឋាករ នៅច្រកទ្វារព្រំដែនអន្តរជាតិកោះរកា បែរជាវ៉ៃពន្ធនាំចូល.ក្នុង១រថយន្តៗ ត្រឹមតែជាង៣តោនប៉ុណ្ណោះ គិតជាប្រាក់ស្មើនឹងជាង១៦លានរៀល.!!។
ប្រភពបន្តថា ជាគោលការណ៍ពន្ធគយនាំចូល”ខោអាវ”១តោនបង់ពន្ធជាង៥លានរៀល! ដូច្នេះ”ខោអាវ”១រថយន្តទម្ងន់២០តោនគឺត្រូវបង់ពន្ធប្រមាណជា១០០លានរៀលទើបត្រឹមត្រូវ!។
ផ្ទុយទៅវិញ! ស្រាប់តែការិយាល័យគយ និងរដ្ឋាករ ច្រកទ្វារព្រំដែនអន្តរជាតិកោះរកា
ដោយយកពន្ធនាំចូលត្រឹមតែ១៦%ប៉ុណ្ណោះ នៃបរិមាណ”ខោអាវ”ជាក់ស្ដែង បណ្ដាលឱ្យខាតចំណូលរដ្ឋ ប្រហែល៨៤% នៃទំនិញដែលបាននាំចូលសរុប.!។
ដោយ ជារៀងរាល់ព្រឹកឈ្មួញតែងតែសាង”ខោអាវ”ពីរថយន្តវៀតណាម មកដាក់លើរថយន្តខ្មែរ ត្រង់ចំណុចក្បែរច្រកទ្វារព្រំដែនកោះរកា!។
ក្នុងនោះ បើដាក់ស្មើទ្រង់គឺទម្ងន់”ខោអាវ”ត្រឹមតែ១៤តោននោះទេ!។
ប៉ុន្តែរាល់លើកគឺឈ្មួញដឹកច្រើនញាត់ខ្ពស់ជាងទ្រង់ ជាហេតុនាំឱ្យរថយន្តកែច្នៃទាំងនោះផ្ទុក”ខោអាវ”បានចាប់ពី២០ ទៅ២២តោនក្នុង១ជើងៗ!។
*ប្រភពបញ្ជាក់ទៀតថា នៅពេលលើក”ខោអាវ”ដាក់លើរថយន្តរួចហើយមន្ត្រីការិយាល័យគយព្រំដែន ក៏ប្រគល់ឯកសារ(វិក្កយបត្រ)ដែលបង់ពន្ធមិនគ្រប់ មកឱ្យឈ្មួញដើម្បីធ្វើជាសំអាងក្នុងការដឹកជញ្ជូន..!។
ទន្ទឹមនិងនោះ ឈ្មួញបានប្រើយុទ្ធសាស្ត្រវាងជញ្ជីង ដោយបើករថយន្តចេញពីព្រំដែន.ឡើងមកឆ្លង”ស្ពានអ្នកលឿង”បត់ឆ្វេងឆ្ពោះទៅកាន់ស្រុកលើកដែក ខេត្តកណ្តាល!។
លុះដល់ផ្លូវបំបែកទៅស្រុកកោះធំ ក៏បត់ស្ដាំមកកោះធំ រួចឆ្លងស្ពានកោះធំ.បត់ស្ដាំតាមស្រុកស្អាង ចូលក្រុងតាខ្មៅ និងបន្តបើកតាមខណ្ឌដង្កោ រាជធានីភ្នំពេញ ហើយយកមកស្តុកទុកនៅ”ឃ្លាំងចំការដូង”និង”ឃ្លាំងអូឡាំពិក”ដើម្បីធ្វើការចែកចាយលើទីផ្សារនានា នៅកម្ពុជាយើង.!។
*ដើម្បីឱ្យមានចម្លើយទាំងសងខាងនៅថ្ងៃទី២៩.១០.២០២៦”ដើមរាំង”បានសុំការបំភ្លឺពីលោក ខៀវ សារឿន ប្រធានសាខាគយ និងរដ្ឋាករ ខេត្តព្រៃវែង ដោយលោកថ្លែងថារូបលោកទើបនិងទទួលបានភារកិច្ចថ្មី គឺពុំមានរឿងអញ្ចឹងទេ..!។
ក្នុងនោះលោក ខៀវ សារឿន ក៏បានជំរុញឱ្យមានទំនាក់ទំនងជាមួយការិយាល័យគយ កោះរកាផងដែរ..!។
*រីឯលោក ចាន់ តារា ប្រធានការិយាល័យគយ និងរដ្ឋាករ ច្រកទ្វារព្រំដែនអន្តរជាតិកោះរកា បានថ្លែងយ៉ាងខ្លីថា មកមើលចុះខ្ញុំរវល់ដែរ.រួចក៏ចុចបិទទូរស័ព្ទ.!!។ក្នុងរឿងនេះមានការស្នើសុំយ៉ាងទទូចដល់ឯកឧត្តមបណ្ឌិត គុណ ញឹម អគ្គនាយកដ្ឋានគយ និងរដ្ឋាករកម្ពុជា មេត្តាពិនិត្យចាត់វិធានការទប់ស្កាត់និងបង្ក្រាប”បទល្មើសរត់ពន្ធ”ដែលកំពុងហូរចូលមកកម្ពុជា តាមច្រកទ្វារព្រំដែនអន្តរជាតិកោះរកា ដើម្បីបង្កើនចំណូលរដ្ឋ និងលុបបំបាត់អំពើពុករលួយ៕
