គ្រួសារបុរសជនជាតិបារាំងអាយុ៥៩ឆ្នាំម្នាក់ បានដាក់ពាក្យបណ្តឹងប្រឆាំងនឹងមន្ត្រីប៉ូលិស ដើម្បីស្នើឱ្យស៊ើបអង្កេតថា តើឧស្ម័នបង្ហូរទឹកភ្នែកអាចជាមូលហេតុដែលបណ្តាលឱ្យបុរសរូបនេះស្លាប់ក្រោយចូលរួមបាតុកម្មនៅទីក្រុងប៉ារីសឬយ៉ាងណា។
សារព័ត៌មានAnadolu Agency។
លោក Christophe M. បានស្លាប់នៅថ្ងៃទី១៧ ខែតុលា ឆ្នាំ២០២៦ ចំពេលមានការប៉ះទង្គិចគ្នារវាងក្រុមបាតុករ និងប៉ូលិស។ តាមលទ្ធផលធ្វើកោសល្យវិច័យដំបូង លោកបានស្លាប់ដោយសារបេះដូង និងប្រព័ន្ធដង្ហើមបរាជ័យស្រួចស្រាវ ក្នុងស្ថានភាពដែលលោកមានជំងឺបេះដូងស្រាប់។
មេធាវីគ្រួសារបាននិយាយថា ជនរងគ្រោះត្រូវបានប៉ះពាល់នឹងឧស្ម័នបង្ហូរទឹកភ្នែកយ៉ាងច្រើន នៅទីលាន Place de la République ក្នុងអំឡុងពេលប៉ះទង្គិចគ្នា។ គ្រួសារបានដាក់ពាក្យបណ្តឹងកាលពីថ្ងៃចន្ទ ដោយចោទប្រកាន់មន្ត្រីប៉ូលិសពីអំពើហិង្សាដែលត្រូវបានចោទថាបណ្តាលឱ្យមនុស្សស្លាប់ ដោយគ្មានចេតនាសម្លាប់។
មេធាវីបានទាមទារឱ្យមានការស៊ើបអង្កេតពេញលេញ ដើម្បីកំណត់មូលហេតុពិតប្រាកដនៃការស្លាប់។ អាជ្ញាធរបានបញ្ជាឱ្យធ្វើការពិនិត្យកោសល្យវិច័យបន្ថែម ខណៈការស៊ើបអង្កេតកំពុងបន្តក្រោមការត្រួតពិនិត្យរបស់ចៅក្រមស៊ើបអង្កេត។
គួរបញ្ជាក់ថា កាលពីថ្ងៃទី១៧ ខែតុលា មនុស្សប្រមាណ ៥៥ ម៉ឺននាក់បានចូលរួមបាតុកម្មនៅទូទាំងប្រទេសបារាំង។ ការប៉ះទង្គិចបានកើតឡើងនៅតាមតំបន់មួយចំនួន ដោយមានរថយន្តត្រូវបានដុត ហាងទំនិញមួយចំនួនត្រូវបានលួច និងមនុស្សជាង ២.០០០ នាក់ត្រូវបានចាប់ខ្លួន៕
