អនុប្រធានាធិបតីអាមេរិក លោក ជេឌី វ៉ាន់ស៍ បានចោទប្រកាន់ថា ការដាក់បេក្ខជនពីរនាក់ដែលមានឈ្មោះស្រដៀងគ្នាខ្លាំងក្នុងការបោះឆ្នោតព្រឹទ្ធសភានៅរដ្ឋអាឡាស្កា អាចធ្វើឱ្យអ្នកបោះឆ្នោតមានការភ័ន្តច្រឡំ និងចាត់ទុកថា ជាការបន្លំការបោះឆ្នោត។
សារព័ត៌មានAnadolu Agency។
ជម្លោះនេះពាក់ព័ន្ធនឹងបេក្ខជនពីរនាក់ដែលមានឈ្មោះស្រដៀងគ្នា គឺលោក ដាន់ ស៊ុលលីវ៉ាន់ ដែលជាសមាជិកព្រឹទ្ធសភាបច្ចុប្បន្ន មកពីគណបក្សសាធារណរដ្ឋ និងលោក ដាន់ ជេ ស៊ុលលីវ៉ាន់ ដែលជាបេក្ខជនម្នាក់ទៀត។
លោកវ៉ាន់ស៍បាននិយាយថា អ្នកបោះឆ្នោតមួយចំនួនអាចច្រឡំឈ្មោះបេក្ខជនទាំងពីរ ដោយសារពួកគេមានការងារ និងកិច្ចការផ្ទាល់ខ្លួនច្រើន។ លោកយល់ថា ការដាក់បេក្ខជនដែលមានឈ្មោះស្រដៀងគ្នា ដើម្បីបង្កការភ័ន្តច្រឡំ គឺជាទង្វើមិនគួរឱ្យគាំទ្រ។
ក្រសួងយុត្តិធម៌អាមេរិកបានដាក់ពាក្យបណ្តឹងទៅតុលាការកាលពីសប្តាហ៍មុន ដើម្បីរារាំងការបញ្ជាក់លទ្ធផលបោះឆ្នោតព្រឹទ្ធសភានៅរដ្ឋអាឡាស្កា ក្នុងកាលៈទេសៈមួយចំនួន ប្រសិនបើសមាជិកព្រឹទ្ធសភាមកពីគណបក្សសាធារណរដ្ឋរូបនេះចាញ់ការបោះឆ្នោត។
មុននេះ ប្រធានាធិបតីអាមេរិក លោក ដូណាល់ ត្រាំ ក៏បានចោទប្រកាន់គណបក្សប្រជាធិបតេយ្យថា បានដាក់បេក្ខជនដែលមានឈ្មោះដូចសមាជិកព្រឹទ្ធសភាបច្ចុប្បន្ន ដើម្បីធ្វើឱ្យអ្នកបោះឆ្នោតច្រឡំ មុនការបោះឆ្នោតពាក់កណ្តាលអាណត្តិនៅខែវិច្ឆិកា។
ទោះជាយ៉ាងណា ការចោទប្រកាន់ទាំងនេះគឺជាការអះអាងរបស់រដ្ឋបាលលោកត្រាំ ខណៈជម្លោះផ្លូវច្បាប់នៅបន្ត ហើយមិនទាន់មានការសម្រេចចុងក្រោយពីតុលាការនៅឡើយទេ៕
