តុលាការឧក្រិដ្ឋកម្មអន្តរជាតិ (ICC) នៅថ្ងៃទី១៩ ខែសីហា បានច្រានចោលយ៉ាងខ្លាំងចំពោះទណ្ឌកម្មថ្មីរបស់សហរដ្ឋអាមេរិក ដែលកំណត់លើប្រធានតុលាការ លោកស្រី Tomoko Akane និងមេធាវីជាន់ខ្ពស់ក្នុងការិយាល័យរដ្ឋអាជ្ញា លោក Abdoulaye Seye។
ប្រភពពីសារព័ត៌មានAnadolu Agency។
ICC បានពណ៌នាវិធានការនេះថា ជាការវាយប្រហារយ៉ាងធ្ងន់ធ្ងរលើឯករាជ្យភាពរបស់ស្ថាប័នតុលាការ និងព្រមានថា ការដាក់ទណ្ឌកម្មលើចៅក្រម រដ្ឋអាជ្ញា និងបុគ្គលិកតុលាការ អាចប៉ះពាល់ដល់នីតិរដ្ឋ និងសណ្តាប់ធ្នាប់ច្បាប់អន្តរជាតិ។
តុលាការបានបញ្ជាក់ថា បច្ចុប្បន្ន ចៅក្រមរបស់ ICC ចំនួន ៩ នាក់ ព្រមទាំងអនុរដ្ឋអាជ្ញា ២ នាក់ អតីតរដ្ឋអាជ្ញា ១ នាក់ និងបុគ្គលិក ១ នាក់ កំពុងស្ថិតក្រោមទណ្ឌកម្មរបស់សហរដ្ឋអាមេរិក។
ICC ក៏បានព្រមានថា សម្ពាធ និងការគំរាមកំហែងអាចប៉ះពាល់ដល់សមត្ថភាពរបស់ជនរងគ្រោះក្នុងការស្វែងរកយុត្តិធម៌ ជាពិសេសអ្នកដែលមិនអាចទទួលបានយុត្តិធម៌តាមមធ្យោបាយផ្សេងទៀត។
ទោះមានទណ្ឌកម្ម ICC បានបញ្ជាក់ថា ខ្លួននឹងបន្តអនុវត្តភារកិច្ចដោយ ឯករាជ្យ និងអព្យាក្រឹត ស្របតាមលក្ខន្តិកៈទីក្រុងរ៉ូម និងដើម្បីការពារផលប្រយោជន៍ជនរងគ្រោះនៃឧក្រិដ្ឋកម្មអន្តរជាតិ៕
