យន្តហោះចម្បាំងអ៊ីស្រាអែលបានបើកការវាយប្រហារតាមអាកាសជាបន្តបន្ទាប់លើតំបន់ជាច្រើននៅភាគខាងត្បូងប្រទេសលីបង់ នៅអំឡុងពេលយប់ឈានចូលថ្ងៃព្រហស្បតិ៍ ទី២០ ខែសីហា ឆ្នាំ២០២៦។ ការបាញ់ផ្លោងដោយកាំភ្លើងធំក៏ត្រូវបានរាយការណ៍ថា បានបន្តរហូតដល់ព្រឹក។
ប្រភពពីសារព័ត៌មានAnadolu Agency។
តាមសារព័ត៌មានរដ្ឋលីបង់ NNA ការវាយប្រហារបានកើតឡើងនៅតំបន់ Ali al-Taher Heights ជុំវិញ Al-Dabsha ក្បែរទីក្រុង Nabatieh និងតំបន់ Dawhet Kfar Rumman។ កងកម្លាំងអ៊ីស្រាអែលក៏បានធ្វើការផ្ទុះ និងបាញ់កាំភ្លើងធំនៅតំបន់ Majdal Zoun និង Al-Mansouri ផងដែរ។
រហូតមកដល់ពេលនេះ មិនទាន់មានព័ត៌មានបញ្ជាក់ពីចំនួនអ្នកស្លាប់ របួស ឬការខូចខាតទ្រព្យសម្បត្តិនៅឡើយទេ។
ការវាយប្រហារនេះកើតឡើង ខណៈអ៊ីស្រាអែល និងលីបង់កំពុងបន្តការចរចាដែលមានសហរដ្ឋអាមេរិកជាអ្នកសម្របសម្រួល ដើម្បីបញ្ចប់ការប្រយុទ្ធ និងរៀបចំសន្តិសុខតាមព្រំដែន។ ភាគីលីបង់ទាមទារឱ្យអ៊ីស្រាអែលបញ្ឈប់ការវាយប្រហារ និងដកកងទ័ពចេញពីទឹកដីរបស់ខ្លួន ខណៈអ៊ីស្រាអែលទាមទារការធានាសន្តិសុខពាក់ព័ន្ធនឹងសកម្មភាពយោធារបស់ Hezbollah នៅភាគខាងត្បូងលីបង់៕
