ក្រុមការពារជនស៊ីវិលនៅតំបន់ហ្គាហ្សា បានរកឃើញសាកសពជនជាតិប៉ាឡេស្ទីនចំនួន១១នាក់ ក្រោមគំនរបាក់បែកនៃផ្ទះមួយខ្នងដែលត្រូវបានបំផ្លាញនៅតំបន់ Zeitoun ភាគអាគ្នេយ៍ទីក្រុង Gaza។
ប្រភពពីសារព័ត៌មានAnadolu Agencyនៅថ្ងៃទី២០ខែសីហា។
ក្រុមជួយសង្គ្រោះបានចំណាយពេល ៣ថ្ងៃ ក្នុងការរុករកគំនរបាក់បែកនៃផ្ទះគ្រួសារ Sawafiri រហូតរកឃើញសាកសពទាំង ១១នាក់។ បន្ទាប់ពីបញ្ចប់ប្រតិបត្តិការនេះ ក្រុមការងារបានបន្តទៅកាន់ទីតាំងផ្សេងទៀត ដើម្បីស្វែងរកសាកសពជនរងគ្រោះដែលនៅជាប់ក្រោមអគារបាក់បែក។
ក្រុមការពារជនស៊ីវិលបានបញ្ជាក់ថា ការងាររុករកមានការលំបាកយ៉ាងខ្លាំង ដោយសារខ្វះឧបករណ៍ និងធនធាន។ បច្ចុប្បន្ន ក្រុមការងារមានឧបករណ៍សំខាន់ៗតិចតួចសម្រាប់ប្រតិបត្តិការ ដូចជា គ្រឿងចក្រជីកដីមួយគ្រឿង ម៉ាស៊ីនឈូសដីមួយគ្រឿង និងរថយន្តដឹកទំនិញមួយគ្រឿង។
យោងតាមព័ត៌មានដែលបានចុះផ្សាយ ការប្រយុទ្ធនៅហ្គាហ្សាចាប់តាំងពីខែតុលា ឆ្នាំ២០២៣ បានបណ្តាលឱ្យមនុស្សជាង ៧៣,០០០នាក់ស្លាប់ និងជាង ១៧៤,០០០នាក់រងរបួស ខណៈហេដ្ឋារចនាសម្ព័ន្ធប្រមាណ ៩០% នៅក្នុងតំបន់នេះត្រូវបានបំផ្លាញ ឬខូចខាត៕
