កាលពីថ្ងៃទី១៨ ខែកញ្ញា ឆ្នាំ២០២៦ ការបាញ់ផ្លោងរបស់កងទ័ពអ៊ីស្រាអែលនៅតំបន់Chaqra ភាគខាងត្បូងប្រទេសលីបង់ បានបណ្តាលឱ្យមនុស្ស២នាក់រងរបួស។ អ្នករងរបួសត្រូវបានបញ្ជូនទៅព្យាបាលនៅមន្ទីរពេទ្យ Tebnin។
ប្រភពពីសារព័ត៌មានAl Jazeera។
នៅថ្ងៃដដែល កងទ័ពអ៊ីស្រាអែលបានរុលទៅជិតទីក្រុង Deir Mimas ហើយបានប្រឈមមុខជាមួយកងទ័ពលីបង់។ រថក្រោះអ៊ីស្រាអែល ២គ្រឿងបានឈប់នៅមុខរបាំងដែលមានកងទ័ពលីបង់ឈរជើងនៅម្ខាងទៀត។
កងទ័ពលីបង់បាននិយាយថា អ៊ីស្រាអែលបានបោះគ្រាប់បែកសំឡេងនៅជិតប៉ុស្តិ៍សង្កេតការណ៍របស់ខ្លួន ដែលបង្កឱ្យកងទ័ពលីបង់បង្កើនការប្រុងប្រយ័ត្ន។
ក្រោយមានការទាក់ទងតាមក្រុមសម្របសម្រួលដែលគាំទ្រដោយសហរដ្ឋអាមេរិក កងទ័ពអ៊ីស្រាអែលបានដកថយទៅទីតាំងរបស់ខ្លួននៅតំបន់ Tell en-Nhas ខណៈកងទ័ពលីបង់ក៏បានត្រឡប់ទៅមូលដ្ឋានរបស់ខ្លួនវិញ។
សូមបញ្ជាក់ថា៖ បច្ចុប្បន្ន អ៊ីស្រាអែលនៅតែកាន់កាប់តំបន់មួយចំនួននៅភាគខាងត្បូងលីបង់ បន្ទាប់ពីសង្គ្រាមជាមួយក្រុម Hezbollah បានផ្ទុះឡើងកាលពីខែមីនា។ ផែនការដែលបានព្រមព្រៀងគ្នាកាលពីខែមិថុនា គ្រោងឱ្យកងទ័ពលីបង់បន្តចូលគ្រប់គ្រងតំបន់នេះ៕
