សម្ព័ន្ធភាពដែលដឹកនាំដោយអារ៉ាប៊ីសាអូឌីត បានប្រកាសកាលពីថ្ងៃចន្ទទី០៥.១០.២០២៦ថា យន្តហោះចម្បាំងចំនួន១០០គ្រឿង បានចូលរួមក្នុងប្រតិបត្តិការយោធា ដែលមានឈ្មោះថា«Dawn of Yemen» (ព្រឹកព្រលឹមនៃប្រទេសយេម៉ែន)ដែលកំពុងបន្តប្រឆាំងនឹងក្រុមហ៊ូធី។
សារព័ត៌មានAnadolu។
សម្ព័ន្ធភាពនេះបានបញ្ជាក់ថា គោលដៅសំខាន់ៗចំនួន ៣២៤កន្លែង ត្រូវបានបំផ្លាញចាប់តាំងពីប្រតិបត្តិការនេះបានចាប់ផ្តើមមក។
នៅក្នុងសេចក្តីថ្លែងការណ៍ដាច់ដោយឡែកមួយ សម្ព័ន្ធភាពបានឱ្យដឹងថា ខ្លួនកំពុងផ្តល់ការគាំទ្រតាមផ្លូវអាកាសពេញ២៤ម៉ោងដល់កងកម្លាំងរដ្ឋាភិបាលយេម៉ែន នៅលើសមរភូមិ និងផ្តល់ការការពារតាមផ្លូវអាកាសសម្រាប់ច្រកសមុទ្រ Bab el-Mandeb ព្រមទាំងបានបន្ថែមថា ប្រតិបត្តិការប្រឆាំងនឹងគោលដៅដែលកំពុងមានចលនានៅតែបន្តធ្វើឡើង។
កងទ័ពយេម៉ែន បានបើកប្រតិបត្តិការ «Dawn of Yemen»ប្រឆាំងនឹងកងកម្លាំងហ៊ូធី ដោយកងកម្លាំងរដ្ឋាភិបាលកំពុងរុលទៅមុខនៅក្នុងតំបន់ជាច្រើន។
អ្នកនាំពាក្យកងទ័ពយេម៉ែន លោកវរសេនីយ៍ទោ Majid Abdullah al-Nuzayli បាននិយាយថា កងកម្លាំងរដ្ឋាភិបាល រួមទាំងកងពលតូច Southern Giants (ដែលគាំទ្ររដ្ឋាភិបាល) និងកងកម្លាំង Nation’s Shield បានគ្រប់គ្រងតំបន់ Bab el-Mandeb បានហើយ។
លោកក៏បានបញ្ជាក់ផងដែរថា កងកម្លាំងរដ្ឋាភិបាល បានគ្រប់គ្រងព្រលានយន្តហោះ Dhubab និងបានកាត់ផ្តាច់ផ្លូវរវាងតំបន់ Dhubab និង Mocha ដោយអាចគ្រប់គ្រងតំបន់ផ្លូវនោះតាមរយៈការវាយប្រហារដោយអាវុធ៕
