ការរំលោភបំពានផ្លូវភេទ និងអំពើហិង្សាក្នុងគ្រួសារលើកុមារនៅប្រទេសអូស្ត្រាលីបានកើនឡើងយ៉ាងខ្លាំងក្នុងរយៈពេល១០ឆ្នាំចុងក្រោយនេះ ជាពិសេសក្នុងរយៈពេល៣ទៅ៥ឆ្នាំចុងក្រោយ នេះបើយោងតាមការសិក្សារបស់សាកលវិទ្យាល័យស៊ីដនី ដែលបានចេញផ្សាយកាលពីថ្ងៃអង្គារ។
ប្រភពពីសារព័ត៌មានAA news។
ការសិក្សានេះបានពិនិត្យទិន្នន័យពីឆ្នាំ២០១៤ ដល់ឆ្នាំ២០២៤ រួមមានករណីដែលបានកត់ត្រាដោយប៉ូលិស ការចូលសម្រាកព្យាបាលនៅមន្ទីរពេទ្យ និងករណីដែលពាក់ព័ន្ធនឹងការការពារកុមារ។
លទ្ធផលបង្ហាញថា ករណីរំលោភបំពានផ្លូវភេទលើក្មេងប្រុសអាយុពី ១០ ដល់ ១៧ ឆ្នាំ បានកើនឡើង ៦០% ក្នុងរយៈពេល ១០ ឆ្នាំ ខណៈអត្រាកើនឡើងបានឈានដល់ ១៥,៧% ក្នុងមួយឆ្នាំ ចាប់តាំងពីឆ្នាំ២០២១។ ចំណែកក្មេងស្រីអាយុពី ១០ ដល់ ១៧ ឆ្នាំ ករណីនេះបានកើនឡើង ៥១% ហើយក្មេងស្រីអាយុ ៩ ឆ្នាំចុះក្រោម កើនឡើង ៣២%។
ជាមួយគ្នានេះ ករណីហិង្សាក្នុងគ្រួសារ និងអំពើហិង្សាក្នុងផ្ទះលើកុមារក៏បានកើនឡើងផងដែរ ដោយអត្រាកើនឡើងប្រចាំឆ្នាំមានចន្លោះពី ៨% ដល់ ២០% ក្នុងក្រុមអាយុមួយចំនួន ចាប់តាំងពីប្រហែលឆ្នាំ២០២០។
អ្នកស្រាវជ្រាវបានលើកឡើងថា កត្តាដែលអាចរួមចំណែកដល់ការកើនឡើងនេះ រួមមានគម្លាតប្រាក់ចំណូលកាន់តែធំ សម្ពាធហិរញ្ញវត្ថុក្រោយជំងឺកូវីដ-១៩ ការផ្លាស់ប្តូរឥរិយាបថទាក់ទងនឹងយេនឌ័រនៅលើអ៊ីនធឺណិត និងកង្វះសេវាជំនួយសម្រាប់កុមារ និងគ្រួសារ។
អ្នកដឹកនាំការស្រាវជ្រាវ លោកស្រី Lucy Grummitt បានព្រមានថា ស្ថានភាពនេះជាសញ្ញាអាសន្នដែលរដ្ឋាភិបាល និងអាជ្ញាធរត្រូវចាត់វិធានការបង្ការ និងការពារកុមារឱ្យបានខ្លាំងក្លាជាងមុន ដើម្បីទប់ស្កាត់អំពើហិង្សា និងការរំលោភបំពានផ្លូវភេទ៕
