បណ្តាញផ្សព្វផ្សាយបារាំងBFMTV បានរាយការណ៍នៅថ្ងៃទី១៥.១០.២០២៦ថា សិស្សានុសិស្ស នៅតែបន្តបិទផ្លូវចូលវិទ្យាល័យ និងសាកលវិទ្យាល័យនានានៅទូទាំងប្រទេសបារាំង។
ខណៈរដ្ឋាភិបាលកំពុងប្រឈម នឹងសម្ពាធជាថ្មី ដើម្បីដោះស្រាយសំណើរបស់ពួកគេ ស្របពេលដែលការចាប់ខ្លួនជាង១.២០០នាក់។
សារព័ត៌មានAnadolu។
រដ្ឋមន្ត្រីក្រសួងអប់រំ លោក Edouard Geffray បាននិយាយថា សិស្សានុសិស្ស នៅវិទ្យាល័យប្រហែល ២០០កន្លែងនៅទូទាំងប្រទេស នៅតែបន្តប្រមូលផ្តុំគ្នា។
លោក Sebastien Lecornu បានថ្លែងថា ការតវ៉ាទាំងនេះលែងមានលក្ខណៈជាចលនា របស់សិស្សទៀតហើយ ប៉ុន្តែបានប្រែក្លាយទៅជា «ចលនាហិង្សានៅក្នុងទីក្រុង»វិញ។
លោកបានថ្កោលទោសចំពោះ«ការអំពាវនាវឱ្យប្រើហិង្សាដ៏គួរឱ្យរន្ធត់បំផុត»នៅក្នុងតំបន់មួយចំនួន។
លោក Lecornu បាននិយាយថា អាជ្ញាធរតំបន់ នឹងត្រូវបានពិគ្រោះយោបល់លើបញ្ហាដែលពាក់ព័ន្ធនឹងអគារសាលារៀន ហើយលោកក៏បានរិះគន់ចំពោះហេតុការណ៍ហិង្សាដែលបានកើតឡើងនៅចុងបញ្ចប់នៃការតវ៉ាផងដែរ។
លោក Geffray បានឱ្យដឹងថា រដ្ឋាភិបាលកំពុងពិនិត្យមើល ដំណើរការចូលរៀននៅសាកលវិទ្យាល័យទាំងមូល តាមរយៈប្រព័ន្ធ Parcoursup (ដែលជាវេទិកាដាក់ពាក្យចូលរៀនថ្នាក់ឧត្តមសិក្សានៅបារាំង) ដោយរំពឹងថានឹងមានវិធានការជាក់លាក់នៅចុងខែតុលា។
លោក បាននិយាយក្នុងអំឡុងពេលចុះទស្សនកិច្ចនៅវិទ្យាល័យមួយក្នុងទីក្រុង Gradignan ភាគនិរតីនៃប្រទេសបារាំងថា៖ «ពេលវេលាសម្រាប់ការសម្រេចចិត្តជិតមកដល់ហើយ ប៉ុន្តែសម្រាប់ពេលនេះ យើងកំពុងធ្វើការលើបញ្ហានេះ»។
លោក Geffray ក៏បានបញ្ជាក់ដែរថា រដ្ឋាភិបាលបានចាត់បញ្ជូនគ្រូបង្រៀនជំនួសចំនួន២/៣ នៃចំនួនសរុប ៣.០០០នាក់ ដែលបានសន្យាទុកនោះ ទៅកាន់សាលារៀននានារួចហើយ។
លោកបន្ថែមថា ចំនួនវិទ្យាល័យដែលត្រូវបានចាត់ថ្នាក់ថាជួបប្រទះការលំបាកពិសេស បានថយចុះពី ១១៤ សាលាកាលពីថ្ងៃព្រហស្បតិ៍សប្តាហ៍មុន មកនៅត្រឹម៤៧ សាលានៅថ្ងៃព្រហស្បតិ៍នេះ។
លោកសង្ឃឹមថា នឹងមិនមានវិទ្យាល័យណាមួយស្ថិតនៅក្នុង«តំបន់ក្រហម» (តំបន់ដែលមានបញ្ហាធ្ងន់ធ្ងរ) ទៀតឡើយ នៅពេលដែលការសិក្សាចាប់ផ្តើមឡើងវិញក្រោយថ្ងៃឈប់សម្រាករដូវស្លឹកឈើជ្រុះ។
តំណាងសិស្សានុសិស្សគ្រោងនឹងជួបជាមួយលោក Geffray ម្តងទៀតនៅក្រសួងអប់រំ នៅវេលាម៉ោង ៥:៣០ ល្ងាចថ្ងៃព្រហស្បតិ៍នេះ។
នៅក្នុងកិច្ចប្រជុំកាលពីថ្ងៃទី៨ ខែតុលា អង្គការសិស្សឈ្មោះ Les Lyceens! និង Union syndicale lyceenne បានអំពាវនាវឱ្យបន្តការតវ៉ា។
ការតវ៉ាក៏បានរាលដាលដល់សាលាពាណិជ្ជកម្ម HEC Paris ដែលស្ថិតនៅ Jouy-en-Josas ភាគខាងលិចទីក្រុងប៉ារីស ដោយនៅទីនោះ សិស្សានុសិស្សបានធ្វើការតវ៉ាដើម្បីគាំទ្រដល់សិស្សវិទ្យាល័យ ដែលនេះជាលើកដំបូងហើយចាប់តាំងពី សកម្មភាពបិទផ្លូវ ឬរារាំងច្រកចូលនៅតែបន្តកើតមាននៅតាមសាលារៀន និងសាកលវិទ្យាល័យមួយចំនួន ក្នុងទីក្រុងប៉ារីស ទីក្រុងម៉ាសៃ (Marseille) និងតំបន់លីយ៉ុង (Lyon)។
អាជ្ញាធរប៉ូលិសទីក្រុងប៉ារីស បានឱ្យដឹងថា មនុស្សចំនួន១.២៦០ នាក់ត្រូវបានចាប់ខ្លួន នៅក្នុងតំបន់ទីក្រុងប៉ារីស ចាប់តាំងពីការតវ៉ារបស់សិស្សនិស្សិតបានចាប់ផ្តើមមក ដោយក្នុងនោះ ៨៦% គឺជាអនីតិជន។
នៅក្នុងរបាយការណ៍បច្ចុប្បន្នភាពនៃស្ថានការណ៍ អាជ្ញាធរប៉ូលិសបានបញ្ជាក់ថា មន្ត្រីប៉ូលិស និងកងកម្លាំងសន្តិសុខ (gendarmes) សរុបចំនួន ២៨៦ នាក់ ព្រមទាំងបុគ្គលិកវិស័យអប់រំចំនួន១៣ នាក់ បានរងរបួស។
អាជ្ញាធរប៉ូលិសបានលើកឡើងថា អំពើហិង្សាកំពុងកើតឡើងដដែលៗ និងកាន់តែមានភាពធ្ងន់ធ្ងរឡើង ដោយបន្ថែមថា សមាជិកកងកម្លាំងសន្តិសុខផ្ទៃក្នុងចំនួន ៧១នាក់ បានរងរបួសក្នុងអំឡុងពេលការតវ៉ានៅថ្ងៃទី១៣ ខែតុលា៕
