អគ្គិភ័យបានរីករាលដាលយ៉ាងឆាប់រហ័ស ដោយសារខ្យល់បក់ខ្លាំង និងឆេះបំផ្លាញផ្ទះយ៉ាងហោចណាស់៦ ខ្នងនៅភាគខាងត្បូងរដ្ឋកាលីហ្វ័រញ៉ា កាលពីថ្ងៃសុក្រទី១៦.១០.២០២៦។
ភ្លើងបានឆាបឆេះ អចលនទ្រព្យដែលមានតម្លៃថ្លៃនៅតាមតំបន់ឆ្នេរ និងបង្ខំឱ្យមនុស្សរាប់ពាន់នាក់ត្រូវជម្លៀសខ្លួនចេញ។
សារព័ត៌មាន(AP)។
ផ្សែងខ្មៅងងឹត ដែលអាចមើលឃើញពីចម្ងាយរាប់ម៉ាយ បានហុយគ្របដណ្តប់លើទីលានវាយកូនបាល់ និងអាងហែលទឹក។
ខណៈដែលក្រុមពន្លត់អគ្គិភ័យកំពុងខិតខំជួយពន្លត់ផ្ទះសម្បែងដែលកំពុងឆេះនៅក្នុងតំបន់ San Juan Capistrano នៃខោនធី Orange (Orange County)។
ម្ចាស់ផ្ទះមួយចំនួនបានជះទឹកលើផ្ទះរបស់ពួកគេ មុនពេលសម្រេចចិត្តចាកចេញតាមបញ្ជាជម្លៀសខ្លួន។
មន្ត្រីបានឱ្យដឹងថា អ្នកពន្លត់អគ្គិភ័យចំនួន២ នាក់ត្រូវបានបញ្ជូនទៅមន្ទីរពេទ្យ ដោយសាររងរបួសពាក់ព័ន្ធនឹងកម្ដៅខ្លាំង។
អាជ្ញាធរមិនទាន់ បានបញ្ជាក់ពីមូលហេតុដែលបង្កឱ្យមានអគ្គិភ័យនេះនៅឡើយទេ ដែលគិតត្រឹមល្ងាចថ្ងៃសុក្រ វាបានឆេះលើផ្ទៃដីតិចជាងមួយម៉ាយការ៉េ។
លោក Rick Loeffler អភិបាលក្រុង San Clemente បាននិយាយថា៖ «ប្រសិនបើខ្យល់បក់ខ្លាំងជាងនេះបន្តិច ឬបក់ក្នុងទិសដៅផ្សេងពីនេះ នោះស្ថានការណ៍អាចនឹងកាន់តែអាក្រក់ជាងនេះទៅទៀត»។
លោក Howard Hart សមាជិកក្រុមប្រឹក្សាក្រុង San Juan Capistrano បាននិយាយថា លោកនិងភរិយាបានជះទឹកលើដំបូលផ្ទះ ហើយផ្លាស់ទីធុងហ្គាស (propane) ឱ្យឆ្ងាយពីផ្ទះ មុនពេលពួកគេជម្លៀសខ្លួនចេញនៅថ្ងៃសុក្រ ដោយយកទៅជាមួយនូវកាបូបដាក់សម្ភារៈចាំបាច់មួយចំនួន។
លោកស្រី Laura Hart បាននិយាយថា ក្នុងរយៈពេលជាង ៥ ទសវត្សរ៍ដែលលោកស្រីរស់នៅក្នុងសហគមន៍នេះ លោកស្រីមិនដែលជួបហេតុការណ៍ដែលតម្រូវឱ្យជម្លៀសខ្លួនដោយសារអគ្គិភ័យបែបនេះពីមុនមកទេ។
លោកស្រីបាននិយាយថា៖«ជាធម្មតា រឿងនេះមិនកើតឡើងចំពោះពួកយើងទេ យើងគ្រាន់តែឃើញវានៅក្នុងព័ត៌មានប៉ុណ្ណោះ។
យើងតែងតែបួងសួងសុំកុំឱ្យរឿងនេះកើតឡើងចំពោះយើង ប៉ុន្តែជាក់ស្តែង ថ្ងៃនេះវាបានកើតឡើងមែន»។
អគ្គិភ័យដែលគេហៅថា«Norte fire» បានចាប់ផ្តើមនៅក្នុងទីក្រុងឆ្នេរ San Clemente ហើយខ្យល់បានបក់នាំភ្លើងនោះចូលទៅក្នុងតំបន់ San Juan Capistrano។
ទីតាំងជម្រកសម្រាប់អ្នកជម្លៀសខ្លួនត្រូវបានបើកនៅក្នុងទីក្រុងនីមួយៗ។ លោក TJ McGovern ប្រធានផ្នែកពន្លត់អគ្គិភ័យនៃអាជ្ញាធរពន្លត់អគ្គិភ័យខោនធី Orange បានឱ្យដឹងថា គិតត្រឹមយប់ថ្ងៃសុក្រ ប្រជាពលរដ្ឋប្រហែល ១៦,០០០ នាក់ត្រូវបានបញ្ជាឱ្យជម្លៀសខ្លួន។
នេះគឺជាអគ្គិភ័យមួយ ក្នុងចំណោមអគ្គិភ័យជាច្រើន នៅក្នុងតំបន់ ដែលកំពុងរងផលប៉ះពាល់ដោយខ្យល់ក្តៅនិងស្ងួត ដែលគេស្គាល់ថាជាខ្យល់«Santa Anas»ដែលបក់ចេញពីតំបន់ខាងក្នុងដីគោកឆ្ពោះទៅកាន់តំបន់ឆ្នេរ៕
