យោងតាមសារព័ត៌មានAxios រដ្ឋមន្ត្រីក្រសួងការពារជាតិអាមេរិក លោក Pete Hegseth បានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ក្នុងអំឡុងពេលនៃដំណើរទស្សនកិច្ចមួយទៅកាន់ប្រទេសអ៊ីស្រាអែល ដែលមិនត្រូវបានប្រកាសជាមុន។
សារព័ត៌មាន Axios ដោយដកស្រង់ប្រភពពីរដែលដឹងពីបញ្ហានេះ បានរាយការណ៍ថា កិច្ចប្រជុំរវាងសម្ព័ន្ធមិត្តដែលមានជំហររឹងមាំ(hawkish) របស់ប្រធានាធិបតីអាមេរិក លោក Donald Trump និងនាយករដ្ឋមន្ត្រីអ៊ីស្រាអែលដ៏ជើងចាស់ ដែលកំពុងប្រឈមមុខនឹងការបោះឆ្នោតដ៏តឹងតែងបំផុតនោះ បានកើតឡើងកាលពីថ្ងៃចន្ទ។
ទីភ្នាក់ងារសារព័ត៌មាន Reuters មិនអាចបញ្ជាក់ពីដំណើរទស្សនកិច្ចនេះបានភ្លាមៗទេ។
ក្រសួងការពារជាតិអាមេរិក (Pentagon) និងស្ថានទូតអ៊ីស្រាអែលប្រចាំនៅទីក្រុងវ៉ាស៊ីនតោន មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ហើយក៏មិនមានព័ត៌មានភ្លាមៗដែរថា តើពួកគេបានពិភាក្សាអំពីអ្វីខ្លះ។
ការគាំទ្រពីលោក Trump
កាលពីថ្ងៃអាទិត្យ ប្រធានាធិបតី Trump បានប្រើប្រាស់បណ្តាញសង្គម Truth Social របស់លោក ដើម្បីប្រកាសគាំទ្រលោក Netanyahu សម្រាប់ការបោះឆ្នោតសភាដែលនឹងមកដល់នៅសប្តាហ៍ក្រោយ។ នេះគឺជាការបោះឆ្នោតលើកដំបូង ចាប់តាំងពីមានការវាយប្រហារដឹកនាំដោយក្រុមហាម៉ាស (Hamas)កាលពីថ្ងៃទី ៧ ខែតុលា ឆ្នាំ ២០២៣ និងការចាប់ផ្តើមយុទ្ធនាការដែលត្រូវបានចោទប្រកាន់ថាជាអំពើប្រល័យពូជសាសន៍របស់អ៊ីស្រាអែលនៅក្នុងតំបន់ហ្គាហ្សា។
លោក Trump បានកោតសរសើរនាយករដ្ឋមន្ត្រីរូបនេះ ដោយចាត់ទុកថាជាសម្ព័ន្ធមិត្តរបស់សហរដ្ឋអាមេរិកនៅក្នុងសង្គ្រាមប្រឆាំងនឹងអ៊ីរ៉ង់។ លោកបានបន្ថែមថា លោក Netanyahu ទទួលបាន«ការគាំទ្រពេញទំហឹង»ពីលោក។
លោក Trump បានសរសេរថា៖ «BIBI NETANYAHU នឹងមិនធ្វើឱ្យអ្នកខកបំណងឡើយ!»។
លទ្ធផលស្ទង់មតិបានបង្ហាញថា សម្ព័ន្ធភាពនយោបាយដែលមាននិន្នាការជាតិនិយមបែបសាសនារបស់លោក Netanyahu ទំនងជានឹងបាត់បង់សំឡេងភាគច្រើនដែលត្រូវការដើម្បីកាន់អំណាច ទោះបីជាយ៉ាងណាក៏ដោយ គណបក្សប្រឆាំងក៏អាចនឹងជួបការលំបាកក្នុងការបង្កើតរដ្ឋាភិបាលផងដែរ។
ទោះជាយ៉ាងណាក៏ដោយ អនុប្រធានាធិបតីអាមេរិក លោក JD Vance បានបដិសេធមិនប្រកាសគាំទ្រលោក Netanyahu នៅក្នុងបទសម្ភាសន៍មួយកាលពីថ្ងៃចន្ទ ដោយលើកឡើងថា លោកមិនលូកដៃចូលក្នុងកិច្ចការបោះឆ្នោតរបស់អ៊ីស្រាអែលនោះទេ។
លោក Vance ដែលធ្លាប់បានធ្វើដំណើរទៅកាន់ទីក្រុង Budapest និងប្រកាសគាំទ្រលោក Viktor Orban នៅក្នុងការបោះឆ្នោតនៅប្រទេសហុងគ្រីកាលពីដើមឆ្នាំនេះ បានថ្លែងនៅក្នុងបទសម្ភាសន៍ជាមួយប្រព័ន្ធផ្សព្វផ្សាយឌីជីថល 2WAY ថា៖ «ខ្ញុំគាំទ្របេក្ខជនអាមេរិក ហើយការផ្តោតអារម្មណ៍របស់ខ្ញុំគឺទៅលើការបោះឆ្នោតពាក់កណ្តាលអាណត្តិ (midterms)»៕
