ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយនៅថ្ងៃពុធ ទី២១ ខែតុលា ឆ្នាំ២០២៦ ថា សហរដ្ឋអាមេរិកអាចបញ្ចប់សង្គ្រាមជាមួយអ៊ីរ៉ង់នៅពេលនេះក៏បាន ប៉ុន្តែអាមេរិកចង់ធានាថា លទ្ធផលដែលទទួលបានអាចរក្សាបានយូរអង្វែង។
ប្រភពពីសារព័ត៌មានAA news។
ថ្លែងនៅក្នុងពិធីជួបជុំមួយក្នុងរដ្ឋ South Carolina លោក ត្រាំ បាននិយាយថា សង្គ្រាមនេះនឹងបញ្ចប់ក្នុងពេលឆាប់ៗនេះ។ លោកក៏បានអះអាងថា សហរដ្ឋអាមេរិកបានយកឈ្នះអ៊ីរ៉ង់ទាំងផ្នែកយោធា និងសេដ្ឋកិច្ច ហើយអ៊ីរ៉ង់នឹងមិនអាចមានអាវុធនុយក្លេអ៊ែរបានឡើយ។
លោក ត្រាំ ក៏បាននិយាយអំពីការបិទខ្ទប់ច្រកសមុទ្រ Hormuz ដោយបានហៅច្រកសមុទ្រនេះថា «ច្រកសមុទ្រ ត្រាំ» និងលើកឡើងថា ប្រសិនបើសហរដ្ឋអាមេរិកអាចប្តូរឈ្មោះឈូងសមុទ្រម៉ិកស៊ិកបាន ហេតុអ្វីមិនអាចប្តូរឈ្មោះច្រកសមុទ្រ Hormuz បានដែរ។
ទន្ទឹមនឹងនេះ កាសែត The New York Times បានរាយការណ៍ថា កងទ័ពសហរដ្ឋអាមេរិក និងអ៊ីស្រាអែលបានរៀបចំផែនការសម្រាប់ការវាយប្រហារជាថ្មីលើអ៊ីរ៉ង់ បន្ទាប់ពីការបោះឆ្នោតពាក់កណ្តាលអាណត្តិរបស់អាមេរិក។ ទោះជាយ៉ាងណា មិនទាន់មានភាពច្បាស់លាស់ថា លោក ត្រាំ នឹងអនុម័តផែនការនេះឬយ៉ាងណានោះទេ។
សូមបញ្ជាក់ថា៖ សង្គ្រាមរវាងសហរដ្ឋអាមេរិក អ៊ីស្រាអែល និងអ៊ីរ៉ង់បានចាប់ផ្តើមនៅថ្ងៃទី២៨ ខែកុម្ភៈ ឆ្នាំ២០២៦។ ក្រោយមក អ៊ីរ៉ង់បានឆ្លើយតបដោយការវាយប្រហារដោយមីស៊ីល និងដ្រូនទៅលើគោលដៅនានាក្នុងតំបន់ ហើយបានធ្វើឱ្យការធ្វើនាវាចរណ៍ឆ្លងកាត់ច្រកសមុទ្រ Hormuz ដែលជាផ្លូវដឹកជញ្ជូនថាមពលដ៏សំខាន់របស់ពិភពលោក ត្រូវបានរារាំងយ៉ាងខ្លាំង៕
