អ៊ីរ៉ង់ បានព្រមានថា ទ្រព្យសម្បត្តិនយោបាយ និងហេដ្ឋារចនាសម្ព័ន្ធរបស់សហរដ្ឋអាមេរិក ព្រមទាំងហេដ្ឋារចនាសម្ព័ន្ធ របស់ប្រទេសនានាដែលចូលរួមក្នុងសង្គ្រាមថ្មីប្រឆាំងនឹងអ៊ីរ៉ង់ នឹងក្លាយជា«គោលដៅស្របច្បាប់»ប្រសិនបើមន្ត្រីអ៊ីរ៉ង់ត្រូវបានគេធ្វើឃាត ឬមានជនស៊ីវិលត្រូវបានសម្លាប់។
សារព័ត៌មានTRTនៅថ្ងៃទី២២.១០.២០២៦។
មន្ត្រីអ៊ីរ៉ង់ ដែលមានមូលដ្ឋាននៅទីក្រុងតេអេរ៉ង់ បាននិយាយថា អ៊ីរ៉ង់សន្មតថា សហរដ្ឋអាមេរិក និងអ៊ីស្រាអែល នឹងបើកការវាយប្រហារមួយទៀត ហើយចាត់ទុកកាយវិការផ្នែកការទូតរបស់ទីក្រុងវ៉ាស៊ីនតោនថា«មិនអាចទុកចិត្តបាន»។
មន្ត្រីរូបនោះ បញ្ជាក់ថា ការយល់ឃើញបែបនេះកាន់តែខ្លាំងឡើង បន្ទាប់ពីមានការលើកឡើងរបស់រដ្ឋមន្ត្រីការបរទេសសហរដ្ឋអាមេរិក លោក Marco Rubio នៅទីក្រុងអាថែន (Athens) ដែលទីក្រុងតេអេរ៉ង់បកស្រាយថា ជាការផ្តល់ហេតុផលផ្អែកលើប្រវត្តិសាស្ត្រ និងអារ្យធម៌ ដើម្បីគាំទ្រដល់សង្គ្រាមរបស់ទីក្រុងវ៉ាស៊ីនតោនប្រឆាំងនឹងអ៊ីរង់។
យោងតាមមន្ត្រីរូបនេះ ថ្នាក់ដឹកនាំផ្នែកនយោបាយ និងបញ្ញវន្តអ៊ីរ៉ង់ កាន់តែជឿជាក់ថា គោលនយោបាយរបស់សហរដ្ឋអាមេរិកចំពោះតំបន់មជ្ឈិមបូព៌ា គឺស្ថិតនៅក្រោមការចង្អុលបង្ហាញពីសំណាក់អ៊ីស្រាអែល ដែលពួកគេជឿថា កំពុងរារាំងទីក្រុងវ៉ាស៊ីនតោនមិនឱ្យស្វែងរកដំណោះស្រាយតាមផ្លូវការទូត។
លោកបានបន្ថែមថា សម្ពាធដែលកើនឡើងពីផ្នែកផ្សេងៗនៃសង្គមអ៊ីរ៉ង់ កំពុងជំរុញឱ្យអាជ្ញាធរចាត់វិធានការ «ដាច់ណាត់»ដើម្បីបំបែកការបិទផ្លូវ (blockade) ដោយចាត់ទុកសកម្មភាពនេះថាជាសិទ្ធិក្នុងការការពារខ្លួនរបស់អ៊ីរង់។
មន្ត្រីរូបនេះបានឱ្យដឹងទៀតថា អ៊ីរ៉ង់បានណែនាំដល់អង្គភាពប្រតិបត្តិការនានាថា ក្នុងករណីមានជម្លោះទ្រង់ទ្រាយធំមួយទៀត ដែលពាក់ព័ន្ធនឹងការធ្វើឃាតមន្ត្រីអ៊ីរង់ និងការសម្លាប់ជនស៊ីវិល អ៊ីរ៉ង់នឹងចាត់ទុកទ្រព្យសម្បត្តិផ្នែកនយោបាយរបស់សហរដ្ឋអាមេរិក និងហេដ្ឋារចនាសម្ព័ន្ធរបស់ប្រទេសនានាដែលចូលរួមក្នុងសង្គ្រាមនោះថាជា «គោលដៅស្របច្បាប់»។
ការព្រមាននេះកើតឡើងចំពេលដែលមានភាពតានតឹងកើនឡើងរវាងទីក្រុងតេអេរ៉ង់ និងទីក្រុងវ៉ាស៊ីនតោន ពាក់ព័ន្ធនឹងការបិទផ្លូវសមុទ្រដោយសហរដ្ឋអាមេរិក និងការដាក់កម្រិតលើការធ្វើដំណើរតាមផ្លូវសមុទ្រឆ្លងកាត់ច្រកសមុទ្រហ័រមូស (Strait of Hormuz)។
សហរដ្ឋអាមេរិក និងអ៊ីស្រាអែល បានបើកការវាយប្រហារផ្នែកយោធាប្រឆាំងនឹងអ៊ីរង់កាលពីថ្ងៃទី២៨ ខែកុម្ភៈ ដែលបង្កឱ្យមានជម្លោះកាន់តែទូលំទូលាយនៅក្នុងតំបន់៕
