ប្រជាជន និងនិស្សិតនៅទីក្រុងទីរ៉ាណា រដ្ឋធានីប្រទេសអាល់បានី បានបន្តធ្វើបាតុកម្មប្រឆាំងរដ្ឋាភិបាលកាលពីថ្ងៃអាទិត្យ ទី២៥ ខែតុលា ឆ្នាំ២០២៦ ទោះបីនាយករដ្ឋមន្ត្រី លោក អេឌី រ៉ាម៉ា បានប្រកាសវិធានការថ្មីដើម្បីបញ្ឈប់ភាពចលាចលក៏ដោយ។
សារព័ត៌មានReuter។
ក្រុមបាតុករបានប្រមូលផ្តុំគ្នានៅមុខក្រសួងអប់រំ មុនពេលដើរទៅកាន់ការិយាល័យនាយករដ្ឋមន្ត្រី។ ពួកគេក៏បានដុតកៅអីដែលលោក រ៉ាម៉ា ដាក់នៅខាងមុខការិយាល័យ ដើម្បីអញ្ជើញក្រុមបាតុករចូលរួមពិភាក្សាជាមួយរដ្ឋាភិបាល។
បាតុកម្មដែលដឹកនាំដោយនិស្សិតនេះ កើតឡើងដោយសារការមិនពេញចិត្តចំពោះអំពើពុករលួយក្នុងរដ្ឋាភិបាល កង្វះការងារធ្វើ និងគុណភាពអប់រំទាប។ ការតវ៉ាបានរីករាលដាលនៅកណ្តាលទីក្រុងទីរ៉ាណា និងទីក្រុងផ្សេងៗទៀតក្នុងប្រទេស។
ក្រុមបាតុករទាមទារឱ្យលោក រ៉ាម៉ា ចុះចេញពីតំណែង។ ក្នុងអំឡុងពេលបាតុកម្មកន្លងមក ពួកគេបានដុតអគាររដ្ឋាភិបាល និងធនាគារ បំផ្លាញកញ្ចក់ហាង និងគប់ដុំថ្មដាក់ប៉ូលិស។
ជាការឆ្លើយតប លោក រ៉ាម៉ា បាននិយាយថា អ្នកដែលទាមទារឱ្យលោកចុះចេញពីតំណែងមិនអាចប្រើអំពើហិង្សាដើម្បីបង្ខំលោកបានទេ ប៉ុន្តែលោកក៏ទទួលស្គាល់ថា ការទាមទារមួយចំនួនរបស់ក្រុមបាតុករអាចមានហេតុផលត្រឹមត្រូវ។
ភាពចលាចលនេះបានក្លាយជាបញ្ហាប្រឈមដ៏ធំមួយសម្រាប់លោក រ៉ាម៉ា ដែលបានកាន់អំណាចតាំងពីឆ្នាំ២០១៣ និងបានជាប់ឆ្នោតសម្រាប់អាណត្តិទី៤ កាលពីឆ្នាំ២០២៥។ ការតវ៉ាបច្ចុប្បន្នក៏កើតឡើងបន្ទាប់ពីមានបាតុកម្មអស់រយៈពេលជាច្រើនខែ ប្រឆាំងគម្រោងអភិវឌ្ឍន៍តំបន់ឆ្នេរប្រណីតមួយ ដែលមានការគាំទ្រពីលោក ចារ៉េត ឃូស្ន័រ កូនប្រសាររបស់ប្រធានាធិបតីអាមេរិក លោក ដូណាល់ ត្រាំ៕
