កាលពីថ្ងៃអាទិត្យទី០១.១១.២០២៦(ម៉ោងនៅក្នុងតំបន់) យន្តហោះឯកជន១គ្រឿងដែលផ្ទុកមនុស្សចំនួន៩នាក់ បានធ្លាក់ចុះក្នុងល្បឿនលឿន ចូលទៅក្នុងតំបន់លំនៅឋានមួយកន្លែង ក្នុងរដ្ឋផ្លរីដាភាគខាងត្បូង ចម្ងាយប៉ុន្មានគឺឡូម៉ែត្រប៉ុណ្ណោះពីភូមិគ្រឹះរបស់លោក ត្រាំ ហើយបានផ្ទុះឆេះជាអណ្តាតភ្លើងស្លាប់ទាំង៩នាក់។
សារព័ត៌មានAP។
ហេតុការណ៍នេះហាក់ដូចជា បានចៀសផុតពីការធ្លាក់ចំផ្ទះប្រជាពលរដ្ឋ ដែលស្ថិតនៅក្បែរផ្លូវថ្នល់ដ៏មមាញឹកមួយ។
រដ្ឋមន្ត្រីក្រសួងដឹកជញ្ជូន បានឱ្យដឹងថា មនុស្សទាំងអស់ដែលនៅលើនោះបានស្លាប់បាត់បង់ជីវិត។
(វីដេអូ)ដែលថតបានដោយប្រជាពលរដ្ឋពីក្នុងរថយន្ត របស់ពួកគេ បានបង្ហាញពីហេតុការណ៍ដ៏គួរឱ្យរន្ធត់ នៅពេលដែលយន្តហោះនោះ(ដែលកំពុងធ្វើដំណើរទៅកាន់ប្រទេសបាហាម៉ាស) បានធ្លាក់ចុះពីលើមេឃ មុនពេលធ្លាក់ប៉ះនឹងដីនៅជិតផ្លូវថ្នល់មួយក្នុងតំបន់ Palm Beach County ហើយផ្ទុះឆេះឡើង។
អណ្តាតភ្លើងបានឆាបឆេះនៅជុំវិញបំណែកផ្លូវថ្នល់ដែលខូចខាត និងរណ្តៅដ៏ធំមួយ។
ខណៈដែលប្រជាពលរដ្ឋជាច្រើនបានឈរនៅក្បែរនោះ ដោយបង្ហាញការភ្ញាក់ផ្អើលយ៉ាងខ្លាំង ព្រោះយន្តហោះបានធ្លាក់នៅចម្ងាយត្រឹមតែប៉ុន្មានហ្វីតពីផ្ទះប្រជាពលរដ្ឋ និងចម្ងាយត្រឹមតែប៉ុន្មានអ៊ីញប៉ុណ្ណោះពីយានយន្តដែលកំពុងធ្វើដំណើរឆ្លងកាត់។
ផ្សែងខ្មៅក្រាស់បានគ្របដណ្តប់លើទីតាំងធ្លាក់នោះ។
លោក Sean Duffy រដ្ឋមន្ត្រីក្រសួងដឹកជញ្ជូន បានបង្ហោះសារនៅលើបណ្តាញសង្គម Xថា យន្តហោះប្រភេទ Learjet 60 មួយគ្រឿងបានធ្លាក់នៅក្នុងតំបន់ Palm Beach County នៅវេលាម៉ោង១២:៥០ ថ្ងៃត្រង់ ដោយលោកបានហៅហេតុការណ៍នេះថាជា «សោកនាដកម្មដ៏គួរឱ្យរន្ធត់បំផុត»។
លោកបានបន្ថែមថា រដ្ឋបាលអាកាសចរណ៍សហព័ន្ធ (FAA) កំពុងបញ្ជូនក្រុមការងារមួយទៅជួយដល់ការស៊ើបអង្កេតរបស់គណៈកម្មាធិការជាតិសុវត្ថិភាពដឹកជញ្ជូន (NTSB)។
លោក Ron DeSantis អភិបាលរដ្ឋផ្លរីដា បានមានប្រសាសន៍ថា មិនទាន់មានសេចក្តីរាយការណ៍អំពីការរងរបួស ឬការស្លាប់របស់ប្រជាពលរដ្ឋដែលនៅលើដីនៅឡើយទេ។
លោក DeSantis បានប្រាប់អ្នកសារព័ត៌មាននៅកន្លែងកើតហេតុថា៖«វាគឺជាការធ្លាក់យន្តហោះដ៏មហន្តរាយមួយ.ហាក់ដូចជាមីស៊ីលមួយគ្រាប់ដែលកំពុងធ្លាក់ចុះមក ហើយបានបន្សល់ទុកនូវរណ្តៅដ៏ធំមួយនៅក្បែរចិញ្ចើមផ្លូវ»។
នៅថ្ងៃអាទិត្យនោះ មានភ្លៀងធ្លាក់យ៉ាងខ្លាំងនៅក្នុងតំបន់នេះ សេវាឧតុនិយមជាតិ (National Weather Service) បានឱ្យដឹងថា ការប្រកាសអាសន្នអំពីទឹកជំនន់ដោយសារភ្លៀងធ្លាក់ខ្លាំងពេក គឺនៅតែមានសុពលភាពរហូតដល់រសៀលថ្ងៃចន្ទ។
យោងតាមរដ្ឋបាលអាកាសចរណ៍សហព័ន្ធ (FAA) យន្តហោះនេះបានហោះចេញពីអាកាសយានដ្ឋានអន្តរជាតិ Austin-Bergstrom ក្នុងរដ្ឋតិចសាស់ (Texas) ដោយមានគោលដៅទៅកាន់ប្រទេសបាហាម៉ាស។
អាជ្ញាធរមិនទាន់បានបញ្ជាក់ភ្លាមៗថា តើអ្វីជាមូលហេតុដែលបណ្ត យោងតាមកំណត់ត្រារបស់មជ្ឈមណ្ឌលគ្រប់គ្រងចរាចរណ៍ផ្លូវអាកាស និងទិន្នន័យតាមដានជើងហោះហើរ មួយរយៈពេលខ្លីក្រោយមក យន្តហោះនោះបានធ្លាក់ចុះយ៉ាងគំហុក។
ដោយក្នុងដំណាក់កាលដំបូងគឺក្នុងអត្រា ១០.០០០ហ្វីតក្នុងមួយនាទី បន្ទាប់មក ២០.០០០ ហ្វីតក្នុងមួយនាទី និងកើនឡើងដល់៣០.០០០ ហ្វីតក្នុងមួយនាទី ដែលធ្វើឱ្យយន្តហោះហោះក្នុងល្បឿនលើសពីកម្រិតដែលបានកំណត់ក្នុងការរចនា។
អ្នកបើកយន្តហោះបានប្រកាសពីស្ថានភាពអាសន្ន និងបានផ្ញើសញ្ញាសុំជំនួយ យន្តហោះបានផ្អៀងយ៉ាងខ្លាំងទៅខាងស្តាំ មុនពេលធ្លាក់បុកនឹងដី។
យោងតាមកំណត់ត្រារបស់មជ្ឈមណ្ឌលគ្រប់គ្រងចរាចរណ៍ផ្លូវអាកាស ដែលថតទុកដោយគេហទំព័រ LiveATC.net គឺប៉ុន្មាននាទីមុនពេលជួបគ្រោះថ្នាក់ អ្នកបើកយន្តហោះបានរាយការណ៍ថាមានទឹកកកកកនៅលើតួនៃយន្តហោះ ហើយមានភាពរង្គោះរង្គើខ្លាំង (turbulence) ដែលធ្វើឱ្យយន្តហោះញ័ររញ្ជួយ និងផ្លាស់ប្តូរកម្ពស់រហូតដល់ ៧០០ ហ្វីត (២១៣ ម៉ែត្រ)៕
