យោធាសហរដ្ឋអាមេរិក បានប្រកាសបង្កើតក្រុមការងារថ្មីមួយ ដើម្បីរឹតត្បិតការដឹកជញ្ជូនអាវុធទំនើប សម្ភារៈយោធា និងបច្ចេកវិទ្យាដែលអាចប្រើប្រាស់បានទាំងក្នុងវិស័យស៊ីវិល និងយោធា ចូលទៅកាន់ប្រទេសអ៊ីរ៉ង់ តាមព្រំដែនគោក និងសមុទ្រកាសព្យែន។
សារព័ត៌មានReuter នៅថ្ងៃទី៨ខែវិច្ឆិកា។
ក្រុមការងារនេះមានឈ្មោះថា «Task Force Iron Gate» មានទីតាំងនៅទីក្រុង Tampa រដ្ឋ Florida និងសហការជាមួយស្ថាប័នរដ្ឋាភិបាលអាមេរិក ដើម្បីទប់ស្កាត់ការដឹកជញ្ជូនសម្ភារៈដែលស្ថិតក្រោមទណ្ឌកម្ម និងប្រភពចំណូលដែលអាមេរិកចាត់ទុកថាខុសច្បាប់។
ចំណាត់ការនេះធ្វើឡើងបន្ទាប់ពីអាមេរិកបានបិទខ្ទប់ផ្លូវសមុទ្ររបស់អ៊ីរ៉ង់អស់រយៈពេលជាច្រើនខែ។ យោងតាមបញ្ជាការកណ្តាលអាមេរិក ការបិទខ្ទប់នេះបានរារាំងការនាំចេញប្រេងឆៅរបស់អ៊ីរ៉ង់ដែលមានតម្លៃជាង២៥ពាន់លានដុល្លារ។
ទោះជាយ៉ាងណា ការស៊ើបអង្កេតរបស់ទីភ្នាក់ងារសារព័ត៌មាន Reuters បានរកឃើញថា អ៊ីរ៉ង់នៅតែអាចនាំចូលសម្ភារៈយោធា គ្រឿងផ្ទុះ និងរថយន្តដឹកទំនិញធុនធ្ងន់ ដែលមានតម្លៃយ៉ាងហោចណាស់២ពាន់លានដុល្លារ ចាប់តាំងពីខែមករា ឆ្នាំ២០២៥ តាមរយៈបណ្តាញសម្ងាត់។
សម្ភារៈទាំងនោះត្រូវបានដឹកចូលអ៊ីរ៉ង់តាមនាវាដឹកទំនិញពីប្រទេសរុស្ស៊ីឆ្លងកាត់សមុទ្រកាសព្យែន តាមរថយន្តពីអាស៊ីកណ្តាល និងតាមយន្តហោះដឹកទំនិញពីប្រទេសចិន។
មេបញ្ជាការបញ្ជាការកណ្តាលអាមេរិក លោក Brad Cooper បានលើកឡើងថា ការសហការជាមួយស្ថាប័នពាក់ព័ន្ធនឹងជួយកាត់បន្ថយសមត្ថភាពរបស់អ៊ីរ៉ង់ក្នុងការផ្គត់ផ្គង់ថវិកា ស្តាររោងចក្រផលិតអាវុធ និងពង្រឹងកម្លាំងយោធារបស់ខ្លួន។
ចំណាត់ការថ្មីនេះបង្ហាញថា សហរដ្ឋអាមេរិកកំពុងបង្កើនសម្ពាធលើអ៊ីរ៉ង់ មិនត្រឹមតែតាមផ្លូវសមុទ្រប៉ុណ្ណោះទេ ប៉ុន្តែថែមទាំងតាមផ្លូវគោក និងបណ្តាញពាណិជ្ជកម្មអន្តរជាតិផងដែរ៕
