អ្នកវិភាគមកពីវិទ្យាស្ថាន ISEAS-Yusof Ishak បានលើកឡើងថា សមាគមប្រជាជាតិអាស៊ីអាគ្នេយ៍ (អាស៊ាន) គួររក្សាគោលការណ៍កិច្ចព្រមព្រៀង ៥ចំណុច (Five-Point Consensus) ឱ្យបានខ្ជាប់ខ្ជួន មុនពេលអនុញ្ញាតឱ្យប្រទេសមីយ៉ាន់ម៉ាត្រឡប់មកចូលរួមក្នុងកិច្ចប្រជុំ និងសកម្មភាពរបស់អាស៊ានពេញលេញឡើងវិញ។
សារព័ត៌មានCNA នៅថ្ងៃទី១១ខែវិច្ឆិកា។
បញ្ហានេះកាន់តែមានការចាប់អារម្មណ៍ បន្ទាប់ពីនាយករដ្ឋមន្ត្រីម៉ាឡេស៊ី លោក Anwar Ibrahim បានជួបមេដឹកនាំមីយ៉ាន់ម៉ា លោក Min Aung Hlaing នៅប្រទេសម៉ាឡេស៊ី កាលពីខែតុលា ឆ្នាំ២០២៦ និងបានបង្ហាញពីបំណងចង់ជួយឱ្យមីយ៉ាន់ម៉ាត្រឡប់មកចូលរួមក្នុងអាស៊ានពេញលេញឡើងវិញ។
ចាប់តាំងពីខែមេសាមក លោក Min Aung Hlaing បានទទួលជំនួបពីប្រទេសឡាវ ថៃ កម្ពុជា វៀតណាម និងម៉ាឡេស៊ី។ ទំនាក់ទំនងទ្វេភាគីរវាងមីយ៉ាន់ម៉ា និងប្រទេសសមាជិកអាស៊ានមួយចំនួនក៏កំពុងមានភាពប្រក្រតីឡើងវិញ ប៉ុន្តែតំណាងនយោបាយរបស់មីយ៉ាន់ម៉ានៅក្នុងកិច្ចប្រជុំកំពូល និងកិច្ចប្រជុំផ្សេងៗរបស់អាស៊ាននៅតែមានការរឹតត្បិត។
អ្នកវិភាគបានបញ្ជាក់ថា អាស៊ានចាំបាច់ត្រូវបែងចែកឱ្យច្បាស់រវាងការរក្សាទំនាក់ទំនង ការធ្វើឱ្យទំនាក់ទំនងទ្វេភាគីប្រក្រតីឡើងវិញ និងការអនុញ្ញាតឱ្យមីយ៉ាន់ម៉ាចូលរួមក្នុងអាស៊ានពេញលេញ។
កិច្ចព្រមព្រៀង ៥ចំណុច គឺជាផែនការសន្តិភាពដែលអាស៊ានបានព្រមព្រៀងគ្នា បន្ទាប់ពីរដ្ឋប្រហារយោធានៅមីយ៉ាន់ម៉ាក្នុងឆ្នាំ២០២១ ដើម្បីស្វែងរកដំណោះស្រាយចំពោះវិបត្តិនយោបាយ និងអំពើហិង្សានៅក្នុងប្រទេសនេះ។
ជារួម អ្នកវិភាគយល់ថា អាស៊ានមិនគួរប្រញាប់ប្រញាល់អនុញ្ញាតឱ្យមីយ៉ាន់ម៉ាចូលរួមពេញលេញឡើងវិញ ដោយផ្អែកលើក្តីសង្ឃឹមថានឹងមានការកែលម្អនោះទេ ប៉ុន្តែគួររង់ចាំមើលវឌ្ឍនភាពជាក់ស្តែងជាមុនសិន៕
