រដ្ឋមន្ត្រីការបរទេសអ៊ីរ៉ង់ លោក Abbas Araghchi កាលពីថ្ងៃអង្គារ ទី១០ ខែវិច្ឆិកា ឆ្នាំ២០២៦ បានអំពាវនាវឱ្យអង្គការសហប្រជាជាតិ (UN) និងទីភ្នាក់ងារថាមពលបរមាណូអន្តរជាតិ (IAEA) ថ្កោលទោសសហរដ្ឋអាមេរិក ចំពោះការផ្តល់ប្រាក់រង្វាន់រហូតដល់ ២០លានដុល្លារ ដើម្បីទទួលបានព័ត៌មានសម្ងាត់ពាក់ព័ន្ធនឹងកម្មវិធីនុយក្លេអ៊ែររបស់អ៊ីរ៉ង់។
សារព័ត៌មានAnadolu Agency។
ក្នុងលិខិតផ្ញើទៅកាន់អគ្គលេខាធិការ UN ប្រធានក្រុមប្រឹក្សាសន្តិសុខ UN និងអគ្គនាយក IAEA លោកបានចាត់ទុកសកម្មភាពរបស់អាមេរិកថាជារឿងមិនអាចទទួលយកបាន និងព្រមានថា វាអាចជំរុញឱ្យមានការធ្វើចារកម្ម ព្រមទាំងបង្កគ្រោះថ្នាក់ដល់អ្នកវិទ្យាសាស្ត្រ និងបុគ្គលិកនុយក្លេអ៊ែររបស់អ៊ីរ៉ង់។
ការផ្តល់ប្រាក់រង្វាន់នេះធ្វើឡើងតាមរយៈកម្មវិធី Rewards for Justice របស់ក្រសួងការបរទេសអាមេរិក ដោយស្វែងរកព័ត៌មានអំពីទីតាំងនុយក្លេអ៊ែរ ឧបករណ៍ អ្នកវិទ្យាសាស្ត្រ និងបុគ្គលិកពាក់ព័ន្ធ ព្រមទាំងផ្តល់លទ្ធភាពផ្លាស់ទីលំនៅដល់អ្នកផ្តល់ព័ត៌មានផងដែរ។
លោក Araghchi ក៏បានព្រមានថា ព័ត៌មានសម្ងាត់ដែលប្រមូលបានក្នុងការត្រួតពិនិត្យរបស់ IAEA មិនគួរត្រូវបានយកទៅប្រើប្រាស់ក្នុងគោលបំណងចារកម្មឡើយ។ លោកបានស្នើឱ្យ IAEA ការពារព័ត៌មានទាំងនេះ និងលើកយកបញ្ហានេះទៅពិភាក្សាក្នុងក្រុមប្រឹក្សាភិបាលរបស់ខ្លួន។
ជម្លោះនេះកើតឡើងក្នុងពេលដែលភាពតានតឹងរវាងអ៊ីរ៉ង់ និងសហរដ្ឋអាមេរិកនៅតែបន្ត បន្ទាប់ពីការវាយប្រហារយោធារបស់អាមេរិក និងអ៊ីស្រាអែលលើអ៊ីរ៉ង់កាលពីថ្ងៃទី២៨ ខែកុម្ភៈ។ ភាគីទាំងពីរនៅតែខ្វែងគំនិតគ្នាលើកម្មវិធីនុយក្លេអ៊ែរ ការដកទណ្ឌកម្ម និងលក្ខខណ្ឌសម្រាប់ការបញ្ចប់ជម្លោះ៕
