ប្រធានក្រុមវិបត្តិអន្តរជាតិ លោកស្រី Comfort Ero បានព្រមានថា ភាពជាប់គាំងក្នុងក្រុមប្រឹក្សាសន្តិសុខអង្គការសហប្រជាជាតិ (អ.ស.ប.) និងការប្រកួតប្រជែងផ្នែកភូមិសាស្ត្រនយោបាយរវាងមហាអំណាច កំពុងធ្វើឱ្យច្បាប់អន្តរជាតិចុះខ្សោយ និងប៉ះពាល់ដល់សមត្ថភាពក្នុងការដោះស្រាយជម្លោះនៅលើពិភពលោក។
សារព័ត៌មានAnadolu Agency នៅថ្ងៃទី១២ខែវិច្ឆិកា។
លោកស្រីបានលើកឡើងថា ការខ្វែងគំនិតគ្នា ការមិនទុកចិត្តគ្នា និងការខ្វះការទទួលខុសត្រូវរបស់ប្រទេសមហាអំណាច បានធ្វើឱ្យក្រុមប្រឹក្សាសន្តិសុខពិបាកបំពេញតួនាទីក្នុងការរក្សាសន្តិភាព និងសន្តិសុខអន្តរជាតិ។ លោកស្រីក៏បានព្រមានថា ស្ថានភាពនេះអាចធ្វើឱ្យបាត់បង់ភាពជឿជាក់ និងភាពស្របច្បាប់របស់អង្គការសហប្រជាជាតិផងដែរ។
លោកស្រីបានបញ្ជាក់ថា ការប្រកួតប្រជែងផ្នែកយោធា និងជម្លោះនៅតំបន់ផ្សេងៗ កំពុងកើនឡើង ខណៈដែលកិច្ចព្រមព្រៀងគ្រប់គ្រងអាវុធ និងការទប់ស្កាត់ការរីកសាយភាយអាវុធនុយក្លេអ៊ែរ ក៏កំពុងប្រឈមនឹងហានិភ័យខ្ពស់។
ចំពោះបញ្ហាកំណែទម្រង់ក្រុមប្រឹក្សាសន្តិសុខ លោកស្រីបានបង្ហាញការសង្ស័យថា ប្រទេសសមាជិកអចិន្ត្រៃយ៍ទាំង៥ គឺសហរដ្ឋអាមេរិក រុស្ស៊ី ចិន អង់គ្លេស និងបារាំង នឹងព្រមបោះបង់សិទ្ធិវេតូរបស់ខ្លួនដោយងាយៗនោះទេ។ លោកស្រីយល់ថា សិទ្ធិនេះជាឧបសគ្គមួយដែលធ្វើឱ្យក្រុមប្រឹក្សាសន្តិសុខពិបាកចាត់វិធានការលើប្រទេសមហាអំណាចដែលអាចរំលោភច្បាប់អន្តរជាតិ។
ជាមួយគ្នានេះ លោកស្រីបានអំពាវនាវឱ្យប្រទេសសមាជិកអង្គការសហប្រជាជាតិ ពង្រឹងតួនាទីមហាសន្និបាត អ.ស.ប. ដើម្បីតាមដាន ត្រួតពិនិត្យ និងដាក់សម្ពាធនយោបាយលើប្រទេសដែលរំលោភធម្មនុញ្ញអង្គការសហប្រជាជាតិ ជាពិសេសប្រទេសមហាអំណាច។
លោកស្រីបានសង្កត់ធ្ងន់ថា ប្រសិនបើក្រុមប្រឹក្សាសន្តិសុខមិនអាចបំពេញតួនាទីរក្សាសន្តិភាពអន្តរជាតិបានទេ ប្រទេសនានាអាចនឹងស្វែងរកកិច្ចសហប្រតិបត្តិការសន្តិសុខតាមរយៈក្រុមចម្រុះផ្សេងៗ ដែលអាចធ្វើឱ្យប្រព័ន្ធអន្តរជាតិបែកបាក់កាន់តែខ្លាំង៕
