នៅពេលយប់ថ្ងៃព្រហស្បតិ៍ ទី១២ ខែវិច្ឆិកា ឆ្នាំ២០២៦ រុស្ស៊ីនិងអ៊ុយក្រែន បានចោទប្រកាន់គ្នាទៅវិញទៅមកអំពីការវាយប្រហារដោយដ្រូន ខណៈបេសកជនអាមេរិកពីររូប គឺលោក Steve Witkoff និងលោក Jared Kushner បានទៅដល់ទីក្រុងម៉ូស្គូ ដើម្បីជួបពិភាក្សាជាមួយប្រធានាធិបតីរុស្ស៊ី លោក Vladimir Putin។
សារព័ត៌មានAnadolu Agency។
ភាគីអ៊ុយក្រែនបានឱ្យដឹងថា ការវាយប្រហាររបស់រុស្ស៊ីបានបណ្តាលឱ្យមនុស្ស ៣ នាក់ស្លាប់ និងជាង ១០ នាក់រងរបួស ព្រមទាំងបង្កការខូចខាតដល់ហេដ្ឋារចនាសម្ព័ន្ធថាមពល និងអគារស្នាក់នៅក្នុងតំបន់ជាច្រើន។ កងកម្លាំងការពារដែនអាកាសអ៊ុយក្រែនអះអាងថា បានបាញ់ទម្លាក់ដ្រូនរុស្ស៊ីចំនួន ៩៤ គ្រឿង ក្នុងចំណោម ១២៣ គ្រឿងដែលបានបាញ់មកលើប្រទេសនេះ។
ចំណែករុស្ស៊ីបានអះអាងថា ខ្លួនបានបាញ់ទម្លាក់ដ្រូនអ៊ុយក្រែនចំនួន ៧១ គ្រឿង នៅក្នុងតំបន់ចំនួន ៧ និងតំបន់គ្រីមៀ។ អាជ្ញាធររុស្ស៊ីក៏បានរាយការណ៍ថា មនុស្សម្នាក់រងរបួសក្នុងការវាយប្រហារពេលយប់ ខណៈដ្រូន ៥ គ្រឿងត្រូវបានស្ទាក់ចាប់នៅពេលធ្វើដំណើរឆ្ពោះទៅទីក្រុងម៉ូស្គូ។
ការវាយប្រហារនេះកើតឡើងមួយថ្ងៃបន្ទាប់ពីកិច្ចចរចាសន្តិភាពរវាងរុស្ស៊ី និងអ៊ុយក្រែន ដែលសម្របសម្រួលដោយសហរដ្ឋអាមេរិកនៅទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម បានបញ្ចប់រយៈពេលពីរថ្ងៃ។ កិច្ចចរចានេះបានឈានដល់ការព្រមព្រៀងលើការដោះដូរឈ្លើយសឹកថ្មីមួយ ប៉ុន្តែមិនទាន់មានព័ត៌មានលម្អិតត្រូវបានបញ្ជាក់នៅឡើយ។
បេសកជនអាមេរិកទាំងពីរគ្រោងនឹងពិភាក្សាជាមួយលោក Putin អំពីចំនួនឈ្លើយសឹកដែលត្រូវដោះដូរ និងលទ្ធភាពចូលរួមរបស់អឺរ៉ុបក្នុងកិច្ចចរចាសន្តិភាព។ បន្ទាប់ពីបញ្ចប់ជំនួបនៅទីក្រុងម៉ូស្គូ ពួកគេនឹងធ្វើដំណើរទៅប្រទេសអៀរឡង់ ដើម្បីជួបប្រធានាធិបតីអ៊ុយក្រែន លោក Volodymyr Zelenskyy៕
