ក្រុមនយោបាយរបស់លោក Gadi Eisenkot មេដឹកនាំគណបក្ស Yashar គ្រោងលុបចោលច្បាប់សំខាន់ៗចំនួន៥ ដែលត្រូវបានអនុម័តក្នុងសម័យរដ្ឋាភិបាលរបស់នាយករដ្ឋមន្ត្រីអ៊ីស្រាអែល លោក Benjamin Netanyahu មុនពេលបង្កើតរដ្ឋាភិបាលថ្មី នេះបើយោងតាមសារព័ត៌មានក្នុងស្រុកអ៊ីស្រាអែល។
សារព័ត៌មានAnadolu Agency នៅថ្ងៃទី១២ខែវិច្ឆិកា។
ផែនការនេះមានគោលបំណងបង្កើតគណៈកម្មការសភាពិសេស ដើម្បីពិនិត្យ និងលុបចោលច្បាប់ទាំង៥ ក្នុងពេលតែមួយ។ ច្បាប់ទាំងនោះពាក់ព័ន្ធនឹងការតែងតាំងចៅក្រម ការត្រួតពិនិត្យផ្នែកច្បាប់លើរដ្ឋាភិបាល ការស៊ើបអង្កេតបទល្មើសរបស់មន្ត្រីប៉ូលិស ការគ្រប់គ្រងប្រព័ន្ធផ្សព្វផ្សាយ និងលក្ខខណ្ឌក្នុងការប្រកាសថានាយករដ្ឋមន្ត្រីមិនអាចបន្តកាន់តំណែងបាន។
ក្រុមអ្នករិះគន់យល់ថា ច្បាប់ទាំងនេះបានបង្កើនឥទ្ធិពលនយោបាយលើស្ថាប័នឯករាជ្យ និងធ្វើឱ្យការត្រួតពិនិត្យអំណាចរដ្ឋាភិបាលចុះខ្សោយ។ ជាពិសេស ការកែប្រែច្បាប់តែងតាំងចៅក្រម និងការផ្លាស់ប្តូរតួនាទីរបស់អគ្គរដ្ឋអាជ្ញា ត្រូវបានគេចាត់ទុកថាបានផ្តល់អំណាចកាន់តែច្រើនដល់រដ្ឋាភិបាល។
ចំពោះច្បាប់ប្រព័ន្ធផ្សព្វផ្សាយ ក្រុមប្រឆាំងបានព្រួយបារម្ភថា ការកែប្រែនេះអាចធ្វើឱ្យរដ្ឋាភិបាលមានឥទ្ធិពលលើសារព័ត៌មាន តាមរយៈការផ្សាយពាណិជ្ជកម្មរបស់រដ្ឋ។ ចំណែកច្បាប់ស្តីពីការប្រកាសថានាយករដ្ឋមន្ត្រីមិនអាចបន្តកាន់តំណែងបាន ក៏ត្រូវបានរិះគន់ថា អាចជួយការពារលោក Netanyahu ក្នុងអំឡុងពេលប្រឈមនឹងសំណុំរឿងពុករលួយ។
ផែនការនេះកើតឡើង ខណៈលោក Eisenkot កំពុងចរចាបង្កើតសម្ព័ន្ធរដ្ឋាភិបាលថ្មី។ ប្រធានាធិបតីអ៊ីស្រាអែល លោក Isaac Herzog បានប្រគល់ភារកិច្ចឱ្យលោក Eisenkot បង្កើតរដ្ឋាភិបាលកាលពីថ្ងៃអាទិត្យ ដោយផ្តល់ពេលវេលា២៨ថ្ងៃ និងអាចបន្ថែមបាន១៤ថ្ងៃទៀត។
ការលុបចោលច្បាប់ទាំងនេះត្រូវបានគេរំពឹងថា នឹងក្លាយជាបញ្ហាសំខាន់មួយក្នុងការផ្លាស់ប្តូរនយោបាយ និងការរៀបចំរដ្ឋាភិបាលថ្មីរបស់អ៊ីស្រាអែល៕
