លោក Jeff Bezos ស្ថាបនិកក្រុមហ៊ុន Amazon បានបញ្ជាក់ថា លោកបានចូលរួមយ៉ាងសកម្មក្នុងការជ្រើសរើសតារាសម្ដែងអង់គ្លេស Robert Pattinson ឱ្យដើរតួជា James Bond ក្នុងខ្សែភាពយន្តថ្មី បន្ទាប់ពីក្រុមហ៊ុន Amazon MGM Studios បានប្រកាសជ្រើសរើសរូបលោកកាលពីថ្ងៃទី១៧ ខែវិច្ឆិកា ឆ្នាំ២០២៦។
សារព័ត៌មានAnadolu Agency។
ថ្លែងក្នុងសន្និសីទមួយនៅរដ្ឋកាលីហ្វ័រញ៉ា លោក Bezos បានឱ្យដឹងថា ដំបូងឡើយក្រុមការងារចង់ជ្រើសរើសតារាសម្ដែងដែលមិនទាន់ល្បីល្បាញខ្លាំង ប៉ុន្តែក្រោយពីបេក្ខជនចុងក្រោយចំនួន៥នាក់បានធ្វើតេស្តសម្ដែង ការសម្ដែងរបស់ Robert Pattinson បានធ្វើឱ្យក្រុមការងារពេញចិត្ត រួមទាំងអ្នកដឹកនាំរឿង Denis Villeneuve ផងដែរ។
លោក Bezos បាននិយាយថា តាមរយៈការធ្វើតេស្តសម្ដែង គេអាចមើលឃើញយ៉ាងច្បាស់ថា Pattinson ស័ក្តិសមនឹងតួអង្គ James Bond។
តារាសម្ដែងវ័យ៤០ឆ្នាំរូបនេះ មានភាពល្បីល្បាញតាមរយៈខ្សែភាពយន្ត The Twilight Saga និង The Batman។ លោកនឹងបន្តតំណែងពីតារាសម្ដែង Daniel Craig ដែលបានបញ្ចប់ការសម្ដែងជាតួ James Bond ក្នុងខ្សែភាពយន្ត No Time to Die កាលពីឆ្នាំ២០២១។
ខ្សែភាពយន្តថ្មីនេះនឹងដឹកនាំដោយលោក Denis Villeneuve និងនិពន្ធសាច់រឿងដោយលោក Steven Knight ដែលជាអ្នកបង្កើតរឿងភាគ Peaky Blinders។ ការផលិតនេះក៏ជាការចាប់ផ្ដើមជំពូកថ្មីសម្រាប់ស៊េរីភាពយន្ត James Bond បន្ទាប់ពី Amazon MGM Studios ទទួលបានសិទ្ធិគ្រប់គ្រងផ្នែកច្នៃប្រឌិតក្នុងឆ្នាំ២០២៥៕

