(កំពង់ចាម)៖ នៅព្រឹកថ្ងៃទី១៩ ខែវិច្ឆិកា ឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញសម្ពោធដាក់ឱ្យប្រើប្រាស់ជាផ្លូវការសមិទ្ធផលកែលំអហេដ្ឋារចនាសម្ព័ន្ធ និងបំពាក់ឧបករណ៍វេជ្ជសាស្ត្រមន្ទីរពេទ្យបង្អែកស្រុកចំនួន៦១កន្លែង (CPA1 និង CPA2) ក្នុងចំណោមមន្ទីរពេទ្យបង្អែកទាំង២កម្រិតនេះ ចំនួន ១០៤នៅទូទាំងប្រទេស.!។
ពិធីសម្ពោធនេះធ្វើឡើងនៅឃុំបាធាយ ស្រុកបាធាយ ខេត្តកំពង់ចាម ដោយមានការអញ្ជើញចូលរួមពីមន្ត្រីជាន់ខ្ពស់រាជរដ្ឋាភិបាលកម្ពុជា មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ និងយុវជនក្នុងខេត្តកំពង់ចាមយ៉ាងច្រើនកុះករ។
រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត បានផ្តោតការយកចិត្តទុកដាក់ខ្ពស់លើការលើកកម្ពស់សុខុមាលភាពប្រជាពលរដ្ឋ និងធ្វើឱ្យការផ្តល់សេវាសុខាភិបាលកាន់តែល្អប្រសើរ ដើម្បីជាទីពឹងរបស់ប្រជាពលរដ្ឋមានមានជំងឺ ឬបញ្ហាសុខភាព។
សម្តេចធិបតី ដាក់ចេញនូវវិធានការគន្លឹះចំនួន៣ ក្នុងការលើកកម្ពស់គុណភាពសេវាសុខាភិបាល និងពង្រឹងសមត្ថភាពផ្តល់សេវាសុខភាពបឋមនៅមូលដ្ឋាន។ វិធានការគន្លឹះទាំង៣នោះរួមមាន៖
១) ការពង្រឹងសមត្ថភាពផ្តល់សេវានៅមណ្ឌលសុខភាព និងមន្ទីរពេទ្យបង្អែក, ២) ការអភិវឌ្ឍសមត្ថភាពស្ថាប័នសុខាភិបាលគ្រប់លំដាប់ថ្នាក់ ក្នុងការគ្រប់គ្រងធនធានមនុស្ស ហិរញ្ញវត្ថុ ការងារនិយ័តកម្ម និងការឆ្លើយតបទៅនឹងការគំរាមកំហែងសុខភាពសាធារណៈ និងគ្រោះអាសន្នសុខភាព, ៣) ការកសាងភាពជាដៃគូរឹងមាំរវាងវិស័យសុខាភិបាលសាធារណៈ និងឯកជន ដើម្បីធានាឱ្យប្រជាជនទទួលបានសេវាថែទាំសុខភាពមានគុណភាព សុវត្ថិភាព និងប្រសិទ្ធភាពខ្ពស់។
ការកែលំអហេដ្ឋារចនាសម្ព័ន្ធ និងបំពាក់ឧបករណ៍វេជ្ជសាស្ត្រមន្ទីរពេទ្យបង្អែកស្រុក ជាវិធានការគន្លឹះមួយរបស់សម្តេចមហាបវរធិបតី ពង្រឹងការផ្តល់សេវា និងការផ្តល់សេវាសុខាភិបាលកាន់តែល្អប្រសើរដល់ប្រជាពលរដ្ឋ ជាពិសេសការជួយសង្គ្រោះបឋមនៅពេលមានបញ្ហាសុខភាពធ្ងន់ធ្ងរ ហើយតម្រូវវះកាត់បន្ទាន់នោះ។
អនុវត្តតាមការចង្អុលបង្ហាញរបស់សម្តេចធិបតី, ក្រសួងសេដ្ឋកិច្ច និងហិរញ្ញវត្ថុបានអនុម័តថវិកាសរុបចំនួន ១៨ ៣០០ ០០០ដុល្លារអាមេរិក សម្រាប់ការអនុវត្តគម្រោងកែលម្អហេដ្ឋារចនាសម្ព័ន្ធ និងបំពាក់ឧបករណ៍វេជ្ជសាស្ត្រនៅមន្ទីរពេទ្យបង្អែកចំនួន ៦១កន្លែង (កម្រិត១ CPA1 និងកម្រិត២ CPA2) ដើម្បីជំរុញការអនុវត្តវិធានការគន្លឹះក្នុងវិស័យសុខាភិបាល។
មកដល់ពេលបច្ចុប្បន្នមន្ទីរពេទ្យបង្អែកចំនួន៦១ ត្រូវបានកែលំអហេដ្ឋារចនាសម្ព័ន្ធ និងធ្វើទំនើបកម្មសម្ភារបរិក្ខារ។
ក្នុងនោះ កម្រិត១ មានចំនួន២៣ និងកម្រិត២ ចំនួន៣៨ នៅក្នុងខេត្តចំនួន២២ (លើកលែងរាជធានីភ្នំពេញ ខេត្តព្រះសីហនុ និងខេត្តស្ទឹងត្រែង)។
ក្នុងខេត្តកំពង់ចាម មន្ទីរពេទ្យបង្អែកស្រុកចំនួន៥ ត្រូវបានលំអហេដ្ឋារចនាសម្ព័ន្ធផ្នែកសង្គ្រោះបន្ទាន់ និងផ្នែកវះកាត់។
មន្ទីរពេទ្យបង្អែកកំរិត២ ចំនួន៤ និងមន្ទីរពេទ្យបង្អែកកំរិត១ ចំនួន១កន្លែង។
មន្ទីរពេទ្យបង្អែកស្រុកទាំង៥នោះរួមមាន៖ មន្ទីរពេទ្យបង្អែកស្រុកបាធាយ (CPA2), មន្ទីរពេទ្យបង្អែកស្រុកស្រីសន្ធរ (CPA2),មន្ទីរពេទ្យបង្អែកស្រុកជើងព្រៃ (CPA2), មន្ទីរពេទ្យបង្អែកស្រុកចំការលើ (CPA2) និងមន្ទីរពេទ្យបង្អែកស្រុកព្រៃឈរ (CPA1)៕

