បារ៉ែន ទាមទារឱ្យអង្គការសហប្រជាជាតិចាត់វិធានការលើអ៊ីរ៉ង់ និងទាមទារសំណងការខូចខាត!

នៅថ្ងៃទី២២ ខែវិច្ឆិកា ប្រទេសបារ៉ែន បានទាមទារឱ្យប្រទេសអ៊ីរ៉ង់ទទួលខុសត្រូវ និងបង់សំណងពេញលេញចំពោះការវាយប្រហារលើទឹកដីរបស់ខ្លួន ព្រមទាំងអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិចាត់វិធានការយ៉ាងម៉ឺងម៉ាត់។
សារព័ត៌មានAnadolu Agency។

ក្រសួងការបរទេសបារ៉ែនបានច្រានចោលការលើកឡើងរបស់អ៊ីរ៉ង់ដែលព្យាយាមបកស្រាយអំពីការវាយប្រហារនេះ ដោយបញ្ជាក់ថា រោងចក្រឧស្សាហកម្មដែលរងការវាយប្រហារនាពេលថ្មីៗនេះ គឺជាទីតាំងស៊ីវិល មិនមែនជាគោលដៅយោធាឡើយ។

បារ៉ែនបានចោទប្រកាន់អ៊ីរ៉ង់ថា បានយកជម្លោះជាមួយប្រទេសដទៃធ្វើជាលេស ដើម្បីវាយប្រហារបារ៉ែន បង្កគ្រោះថ្នាក់ដល់ប្រជាជនស៊ីវិល និងរំលោភលើអធិបតេយ្យភាពរបស់ប្រទេសខ្លួន។ ក្រសួងក៏បានបញ្ជាក់ថា បារ៉ែនមានសិទ្ធិការពារខ្លួន ទាំងដោយឯកឯង និងសហការជាមួយសម្ព័ន្ធមិត្ត។

ការលើកឡើងនេះធ្វើឡើងបន្ទាប់ពីការវាយប្រហារកាលពីថ្ងៃសៅរ៍ ដែលបណ្តាលឱ្យរោងចក្រឧស្សាហកម្មមួយកន្លែងឆាបឆេះ និងបង្កការខូចខាតទ្រព្យសម្បត្តិ ប៉ុន្តែមិនមានអ្នករងរបួសនោះទេ។ កងកម្លាំងការពារបារ៉ែនក៏បានរាយការណ៍ថា បានស្ទាក់ចាប់ការវាយប្រហារជាច្រើនលើក ដោយមានការខូចខាតតិចតួចពីបំណែកអាវុធធ្លាក់មកលើដី។

ជាមួយគ្នានេះ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានអះអាងថា ខ្លួនបានបំផ្លាញរ៉ាដាប្រព័ន្ធការពារដែនអាកាស Patriot របស់សហរដ្ឋអាមេរិកចំនួន២ នៅតំបន់ Riffa និង Awali តាមរយៈការវាយប្រហារដោយមីស៊ីល និងដ្រូន។ អ៊ីរ៉ង់ក៏បានរាយការណ៍ពីការវាយប្រហារលើទីតាំងយោធាអាមេរិកនៅ Sheikh Isa និង Juffair ផងដែរ៕

Leave a Reply

Your email address will not be published. Required fields are marked *