អាហ្វ្រិកខាងត្បូងកំពុងចាប់ផ្តើមការស៊ើបអង្កេតអំពីរបៀបដែលពលរដ្ឋរបស់ខ្លួនចំនួន ១៧ នាក់ដែលត្រូវបានរាយការណ៍ថាមានវត្តមានជាទាហានសុីឈ្នួលនៅតំបន់ Donbas ដែលរងការបំផ្លិចបំផ្លាញដោយសង្គ្រាមនៅភាគខាងកើតអ៊ុយក្រែន។
ប្រភពពីសារព័ត៌មានThe Guardian។
ការិយាល័យរបស់ប្រធានាធិបតីអាហ្វ្រិកខាងត្បូង លោក Cyril Ramaphosa បាននិយាយថា ខ្លួនបានទទួលការហៅទូរស័ព្ទសុំជំនួយពីបុរស ១៧ នាក់ ដែលមានអាយុចន្លោះពី ២០ ទៅ ៣៩ ឆ្នាំ ដែលត្រូវបានល្បួងឱ្យចូលរួមជាមួយកងកម្លាំងស៊ីឈ្នួលដែលពាក់ព័ន្ធនឹងសង្គ្រាមអ៊ុយក្រែន-រុស្ស៊ី ក្រោមលេសនៃកិច្ចសន្យាការងារដែលរកប្រាក់ចំណេញច្រើនហើយឥឡូវនេះកំពុងស្នើសុំជំនួយដើម្បីត្រឡប់ទៅផ្ទះវិញ។
ទោះជាយ៉ាងណា សេចក្តីថ្លែងការណ៍នោះមិនបានបញ្ជាក់ថា បុរសទាំងនោះកំពុងប្រយុទ្ធឱ្យភាគីណានោះទេ ហើយអ្នកនាំពាក្យប្រធានាធិបតី លោក វីនសិន ម៉ាហ្គ្វេងយ៉ា (Vincent Magwengya) បាននិយាយថា «យើងមិនទាន់ដឹងនៅឡើយទេ ដែលនោះហើយជាមូលហេតុនៃការស៊ើបអង្កេត»។
គួរបញ្ជាក់ថា ប្រទេសជាច្រើនទៀតដូចជា កេនយ៉ា ឥណ្ឌា នេប៉ាល់ និងស្រីលង្កា ក៏ធ្លាប់បានបញ្ជាក់ដែរថា ពលរដ្ឋរបស់ខ្លួនត្រូវបានជ្រើសរើសក្រោមរូបភាពបោកបញ្ឆោតឱ្យទៅចូលរួមក្នុងសង្គ្រាមរបស់រុស្ស៉ី។ ក្នុងខែឧសភា អង្គការផ្តួចផ្តើមសកលប្រឆាំងនឹងឧក្រិដ្ឋកម្មឆ្លងដែន បានរាយការណ៍ថា ស្ត្រីមកពីប្រទេសអាហ្វ្រិកជាង ២០ ត្រូវបានជ្រើសរើសក្រោមហេតុផលមិនពិតឱ្យទៅផលិតដ្រូនសម្រាប់សង្គ្រាមរបស់រុស្ស៉ីផងដែរ៕