កាលពីថ្ងៃព្រហស្បតិ៍ទី៦ខែវិច្ឆិកាមនុស្សបួននាក់បានស្លាប់ និងរាប់សិបនាក់រងរបួសនៅប្រទេសកេនយ៉ា ពេលដែលប៉ូលីសបានបាញ់កាំភ្លើងនិងបាញ់ឧស្ម័នបង្ហូរទឹកភ្នែកដើម្បីបំបែកអ្នកកាន់ទុក្ខរាប់ពាន់នាក់ក្នុងអំឡុងពេលមើលសពអតីតនាយករដ្ឋមន្ត្រី រ៉ៃឡា អូឌីនហ្កា (Raila Odinga) ជាសាធារណៈ។
ប្រភពពីសារព័ត៌មានBBC។
អាជ្ញាធរបានបញ្ជាក់ពីអ្នកស្លាប់ និងរបួសទៅកាន់ប្រព័ន្ធផ្សព្វផ្សាយ ដោយបង្ហាញថា ការស្លាប់នេះបានកើតឡើងនៅពេលដែលមានការភ័យស្លន់ស្លោនៅពេលដែលហ្វូងមនុស្សបានរុញច្រានឆ្លងកាត់របាំងសន្តិសុខនៅឯពហុកីឡដ្ឋាន ការសារ៉ានី (Kasarani) ចម្ងាយប្រហែល 12 គីឡូម៉ែត្រភាគឦសាននៃកណ្តាលទីក្រុង ណៃរ៉ូប៊ី (Nairobi)។
សាកសពរបស់អ្នកដែលត្រូវបានសម្លាប់ ត្រូវបានសង្កេតឃើញថា ពោរពេញទៅដោយគ្រាប់កាំភ្លើង។
សាក្សីបាននិយាយថា ការបាញ់ប្រហារយ៉ាងខ្លាំងក៏ត្រូវបានថតនៅលើការផ្សាយផ្ទាល់របស់ប្រធានាធិបតីកេនយ៉ានៅលើក្រុមហ៊ុនប្រព័ន្ធផ្សព្វផ្សាយសង្គមអាមេរិក X និង YouTube បានខ្ចាត់ខ្ចាយមនុស្សរាប់ពាន់នាក់ ដោយមនុស្សជាច្រើននាក់ត្រូវបានជាន់ឈ្លី។
យ៉ាងណាមិញ ប៉ូលីសបាននិយាយដោះសារថា មិនបានបាញ់តម្រង់ហ្វូងមនុស្សនោះទេ ពួកគេបានបាញ់ឡើងលើអាកាសដើម្បីគ្រប់គ្រងហ្វូងមនុស្សដែលកំពុងព្យាយាមបង្ខំចូលទៅក្នុងស្តង់សំខាន់របស់ពហុកីឡដ្ឋានតែប៉ុណ្ណោះ។
អាជ្ញាធរបាននិយាយថា ហ្វូងមនុស្សបានយកឈ្នះលើរបាំងសន្តិសុខ ខណៈដែលអារម្មណ៍រោលរាលដោយកំហឹងបានកើនឡើងខ្ពស់ ដោយសារតែការស្លាប់របស់មេដឹកនាំប្រឆាំងចាស់វស្សា ដែលបានស្លាប់កាលពីថ្ងៃពុធនៅ កឺរ៉ាឡា (Kerala) ប្រទេសឥណ្ឌា បន្ទាប់ពីគាំងបេះដូងអំឡុងពេលព្យាបាលនៅមន្ទីរពេទ្យ អាយ័រវីឌីក (Ayurvedic)៕