រដ្ឋមន្ត្រីការបរទេសទីក្រុងគៀវ បានបង្ហាញកាលពីថ្ងៃសុក្រទី៧ខែវិច្ឆិកា ថាពលរដ្ឋជាង ១៤០០នាក់មកពីទ្វីបអាហ្វ្រិកចំនួន ៣៦ ប្រទេសកំពុងធ្វើជាទាហានសុីឈ្នួលឲ្យរុស្ស៊ីប្រយុទ្ធជាមួយប្រទេសអ៊ុយក្រែន។
ប្រភពពីសារព័ត៌មានIndependent។
លោក Andriy Sybiha បានព្រមានថា រុស្ស៊ីកំពុងទាក់ទាញជនជាតិអាហ្វ្រិកឱ្យចូលរួមក្នុងកិច្ចសន្យាដែលលោកបានពិពណ៌នាថាស្មើនឹងការកាត់ទោសប្រហារជីវិតដោយជំរុញឱ្យរដ្ឋាភិបាលអាហ្វ្រិកចេញការព្រមានដល់ប្រជាជនរបស់ពួកគេ។
គួរជម្រាបថា ការអះអាងរបស់អ៊ុយក្រែននេះ ធ្វើឡើងមួយថ្ងៃបន្ទាប់ពីប្រទេសអាហ្វ្រិកខាងត្បូងបានប្រកាសថា ខ្លួននឹងបើកការស៊ើបអង្កេតករណីពលរដ្ឋ ១៧នាក់របស់ខ្លួន ដែលបានទៅចូលរួមជាមួយកម្លាំងទាហានស៊ីឈ្នួល បន្ទាប់ពីពួកគេបានផ្ញើសារសុំជំនួយដើម្បីវិលត្រឡប់មកវិញ។ ប្រទេសជាច្រើនទៀតដូចជា កេនយ៉ា ក៏បានបញ្ជាក់ដែរថា ពលរដ្ឋរបស់ខ្លួនត្រូវបានជ្រើសរើសដោយមិនដឹងខ្លួនឱ្យទៅជាប់ពាក់ព័ន្ធក្នុងជម្លោះនេះផងដែរ៕