រុស្ស៉ី បើកការវាយប្រហារលើស្ថានីយ៍រងនុយក្លេអ៊ែររបស់អ៊ុយក្រែន កាលពីយប់ថ្ងៃសុក្រទី៧ខែវិច្ឆិកា ដោយបានសម្លាប់មនុស្សយ៉ាងហោចណាស់៧នាក់និងបំផ្លាញរោងចក្រថាមពលធំៗចំនួន៣។
ប្រភពពីសារព័ត៌មាន Reuters។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា រុស្ស៉ីបានបាញ់ដ្រូនមកជាង ៤៥០គ្រឿង និងមីស៉ីល ៤៥គ្រាប់។ មនុស្សពីរនាក់បានស្លាប់ និង ១២នាក់រងរបួសនៅក្នុងទីក្រុង Dnipro នៅពេលដែលដ្រូនត្រូវចំអគារផ្ទះល្វែងមួយ។ មន្ត្រីក្នុងតំបន់និយាយថា មនុស្សម្នាក់ត្រូវបានសម្លាប់នៅក្នុងតំបន់ Kharkiv។ តាមនាយករដ្ឋមន្ត្រីអ៊ុយក្រែន លោក ស្រី Yulia Svyrydenko រោងចក្រថាមពលនៅក្នុងតំបន់ Kyiv, Poltava និង Kharkiv បានរងការខូចខាត។
ក្រសួងការពារជាតិរុស្ស៉ី បានឱ្យដឹងថា ខ្លួនបានចាប់ផ្តើមការវាយប្រហារដ៏ធំជាមួយអាវុធរយៈចម្ងាយឆ្ងាយបាញ់ចេញពីដី និងសមុទ្រ ទៅលើទីតាំងផលិតអាវុធ និងទីតាំងថាមពល ដើម្បីឆ្លើយតបទៅនឹងការវាយប្រហាររបស់ទីក្រុងកៀវមកលើប្រទេសរុស្ស៉ី។
គួរបញ្ជាក់ដែរថា អ៊ុយក្រែនតែងតែបញ្ជូនដ្រូនរបស់ខ្លួនទៅវាយប្រហារទីតាំងប្រេងនៅក្នុងប្រទេសរុស្ស៉ី។ ខណៈកិច្ចខិតខំប្រឹងប្រែងផ្នែកការទូតដើម្បីបញ្ឈប់សង្រ្គាម បានធ្លាក់ចុះ ទីក្រុងកៀវ កំពុងព្យាយាមកាត់បន្ថយលទ្ធភាពរបស់ទីក្រុងមូស្គូក្នុងការផ្តល់ហិរញ្ញប្បទានដល់សង្រ្គាមរបស់ខ្លួន៕