ក្រសួងសុខាភិបាល បាននិយាយកាលពីល្ងាចថ្ងៃអង្គារទី១៨ ខែវិច្ឆិកា ថាយ៉ាងហោចណាស់មានមនុស្ស១៣នាក់ត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែល លើជំរំជនភៀសខ្លួនប៉ាឡេស្ទីន Ain al-Hilweh ក្នុងទីក្រុង Sidon ភាគខាងត្បូងប្រទេសលីបង់។
ប្រភពពីសារព័ត៌មានAljazeera។
នៅក្នុងសេចក្តីថ្លែងការណ៍មួយ ក្រសួងបាននិយាយថា មនុស្សជាច្រើនទៀតបានរងរបួសនៅក្នុងការវាយប្រហារដែលកំណត់គោលដៅមជ្ឈមណ្ឌលមួយនៅក្នុងជំរំ ដោយមិនបានបញ្ជាក់ពីចំនួនពិតប្រាកដនោះទេ។
យោងតាមទីភ្នាក់ងារសារព័ត៌មានរដ្ឋ NNA មីស៊ីលចំនួនបីគ្រាប់ត្រូវបានបាញ់ចូលទៅក្នុងមជ្ឈមណ្ឌល។
សារព័ត៌មាននេះបាននិយាយថា មនុស្សមួយចំនួនធំបានរងរបួសត្រូវបានបញ្ជូនទៅមន្ទីរពេទ្យនៅ Sidon បន្ទាប់ពីការវាយប្រហារនេះ ចំពេលមានការអំពាវនាវឱ្យអ្នកស្រុកបរិច្ចាគឈាមសម្រាប់ជនរងគ្រោះ។
យ៉ាងណាមិញ កងទ័ពអ៊ីស្រាអែលបានអះអាងថា ការវាយប្រហារនេះកំណត់គោលដៅសមាជិកហាម៉ាសនៅក្នុងមជ្ឈមណ្ឌល បានចោទប្រកាន់ថា មជ្ឈមណ្ឌលគោលដៅនោះ កំពុងត្រូវបានប្រើប្រាស់ ដើម្បីរៀបចំផែនការវាយប្រហារប្រឆាំងនឹងអ៊ីស្រាអែល។
ចំណែកហាម៉ាសវិញ បានថ្កោលទោសការវាយប្រហារនេះថាជាការវាយប្រហារយ៉ាងឃោរឃៅលើជនស៊ីវិល និងជាការរំលោភលើអធិបតេយ្យភាពរបស់ប្រទេសលីបង់៕