អាជ្ញាធរឥណ្ឌូនេស៊ី បានប្រញាប់ប្រញាល់ជម្លៀសប្រជាជនជាង៨,000 នាក់ នៅខេត្តស៊ូម៉ាត្រាបន្ទាប់ពីភ្លៀងធ្លាក់ខ្លាំង បណ្តាលឱ្យមានទឹកជំនន់ និងការរអិលបាក់ដីធ្ងន់ធ្ងរ។
ប្រភពពីសារព័ត៌មានAl jazeera នៅថ្ងៃទី២៧ខែវិច្ឆិកា។
ភ្លៀង និងព្យុះស៊ីក្លូនត្រូពិចកម្រមួយ បានធ្វើឱ្យតំបន់នេះ កាត់ផ្តាច់ទាំងស្រុងទាំងផ្លូវគោក និងការទំនាក់ទំនង ទើបធ្វើឱ្យកិច្ចខិតខំប្រឹងប្រែងជួយសង្គ្រោះជួបការលំបាកយ៉ាងខ្លាំង។មន្ត្រីប៉ូលីសតំបន់ ខេត្តស៊ូម៉ាត្រាខាងជើង លោក Ferry Walintukan បានបញ្ជាក់ថា មានអ្នកស្លាប់យ៉ាងហោចណាស់ ៣៤ នាក់ ខណៈដែល មនុស្ស ៥២ នាក់ទៀតនៅតែបាត់ខ្លួន។ នៅតំបន់ខ្លះ ក្រុមរោងចក្រ និងផ្ទះសម្បែងទាំងស្រុងត្រូវបានទឹកលិច និងកម្ទេចដោយទឹក។
មន្ត្រីទប់ស្កាត់គ្រោះមហន្តរាយជាតិ លោក Abdul Muhari បាននិយាយថា ភ្លៀងធ្លាក់លើកំពូលភ្នំ និងបណ្ដោយច្រាំងភ្នំ បានបង្កឱ្យមានការរអិលបាក់ដីធ្ងន់ធ្ងរ។ ផ្លូវចេញចូលច្រើនត្រូវបានបិទ ដោយជំនួយត្រូវបញ្ជូនតាម ឧទ្ធម្ភាគចក្រ ជាចម្បង។
តំបន់ Sibolga និង Central Tapanuli គឺជាតំបន់រងផលប៉ះពាល់ខ្លាំងបំផុត។ មន្ត្រីមួយរូបនៅតំបន់នេះ លោក Yuyun Karseno បានបញ្ជាក់ថា ព័ត៌មាន និងថាមពលត្រូវបានកាត់ផ្តាច់ជាច្រើនម៉ោងហើយ។ “មនុស្សនៅក្នុងតំបន់មួយចំនួនមិនអាចទាក់ទងបានទៀតទេ។ ពួកយើងមិនអាចចូលទៅជួយសង្គ្រោះតាមផ្លូវគោកបានឡើយ៕