មន្ត្រីនៃប្រទេសអ៊ីរ៉ង់ម្នាក់ បានប្រាប់ទីភ្នាក់ងារសារព័ត៌មាន Reuters នៅថ្ងៃទី១៨ ខែមករា ថាមនុស្សយ៉ាងហោចណាស់៥,០០០នាក់ រួមទាំងកងកម្លាំងសន្តិសុខប្រហែល៥០០នាក់ បានស្លាប់ដោយសារបាតុកម្មទូទាំងប្រទេស។
ខណៈស្ថាប័នតុលាការអ៊ីរ៉ង់ បានបង្ហើបថា ក្រុមបាតុករ ខ្លះប្រឈមនឹងទោសប្រហារជីវិតផងដែរ។
សារព័ត៌មានReuters នៅថ្ងៃ១៨ ខែមករា ឆ្នាំ២០២៦។
អ្នកនាំពាក្យតុលាការលោក អាសហ្គា ចាហានហ្គី (Asghar Jahangir) បានព្រមានថា សកម្មភាពមួយចំនួនត្រូវបានចាត់ទុកថាជា ទង្វើ Mohareb ដែលជាបទល្មើសត្រូវផ្តន្ទាទោសប្រហារជីវិតតាមច្បាប់ឥស្លាម។
បាតុកម្មដែលផ្ទុះឡើង តាំងពីថ្ងៃទី២៨ ខែធ្នូ ឆ្នាំ២០២៥ ជាភាពចលាចលដ៏សាហាវបំផុតចាប់តាំងពីបដិវត្តន៍ឥស្លាមឆ្នាំ១៩៧៩។
ប្រធានាធិបតីអាមេរិក លោក ដូណាល់ ត្រាំ បានគំរាមអន្តរាគមន៍ ហើយបានប្រាប់សារព័ត៌មាន Politico ថា វាដល់ពេលដែលត្រូវស្វែងរកមេដឹកនាំថ្មីនៅអ៊ីរ៉ង់ហើយ។
មេដឹកនាំកំពូល អាយ៉ាតូឡា អាលី ខាមេនី បានទទួលស្គាល់ថាមាន មនុស្សស្លាប់រាប់ពាន់នាក់។
ប៉ុន្តែបានចោទប្រកាន់សហរដ្ឋអាមេរិក និងអ៊ីស្រាអែលថា ជាអ្នករៀបចំអំពើហិង្សានេះ។
ក្រុមសិទ្ធិមនុស្ស បានប៉ាន់ប្រមាណថា អ្នកស្លាប់ជាង៣,៣០០នាក់ និងមានការចាប់ខ្លួនជាង ២៤,០០០នាក់ឯណោះ៕