មន្ត្រីអនុវត្តច្បាប់អន្តោប្រវេសន៍ និងគយសហរដ្ឋអាមេរិក (ICE) បានឃុំខ្លួនក្មេងប្រុសអាយុ ៥ ឆ្នាំម្នាក់ ឈ្មោះ Liam Conejo Ramos នៅរដ្ឋមីនីសូតា ខណៈកំពុងត្រឡប់ពីសាលាមត្តេយ្យ ដោយមន្ត្រីសាលាចោទថា កុមារនេះត្រូវបានប្រើជានុយដើម្បីចាប់ខ្លួនឪពុករបស់គាត់ ដែលកំពុងស្នើសុំសិទ្ធិជ្រកកោននៅសហរដ្ឋអាមេរិក។
ប្រភពពីសារព័ត៌មានAl Jazeera នៅថ្ងៃទី២៣ខែមករា។
អធិការសាលាសាធារណៈ Columbia Heights បានឲ្យដឹងថា ភ្នាក់ងារ ICE បានយកកុមារចេញពីរថយន្ត និងបញ្ជាឲ្យគាត់គោះទ្វារផ្ទះ ដើម្បីពិនិត្យថាមានមនុស្សនៅខាងក្នុងឬអត់។ គ្រួសារនេះបានចូលសហរដ្ឋអាមេរិកក្នុងឆ្នាំ ២០២៤ ហើយករណីសុំសិទ្ធិជ្រកកោននៅតែសកម្ម ដោយមិនមានបទបញ្ជាឱ្យចាកចេញពីប្រទេសនោះឡើយ។
មេធាវីរបស់គ្រួសារ បាននិយាយថា កុមារ និងឪពុកត្រូវបានផ្ទេរទៅមណ្ឌលឃុំឃាំងអន្តោប្រវេសន៍នៅរដ្ឋ Texas ខណៈក្រុមការពារសិទ្ធិកុមារ ព្រមានថា ស្ថានភាពនៅមណ្ឌលឃុំឃាំងកាន់តែអាក្រក់ ដោយកុមារជាច្រើនរងជំងឺ ខ្វះអាហារូបត្ថម្ភ និងទទួលរងផលប៉ះពាល់ធ្ងន់ធ្ងរពីការឃុំខ្លួនរយៈពេលយូរ៕