លោក Tayyip Erdogan ប្រធានាធិបតីទួរគី បានប្រកាសថា ទួរគីកំពុងខិតខំប្រឹងប្រែង ដើម្បីកុំផ្ទុះសង្គ្រាមរវាងសហរដ្ឋអាមេរិក និងអ៊ីរ៉ង់។
ខណៈដែលភាគីទាំងពីរ កំពុងខ្វែងគំនិតគ្នាលើបញ្ហាអាវុធនិងមីស៊ីល..!។
សារព័ត៌មាន Reuters។
ពេលធ្វើដំណើរត្រឡប់ មកពីបំពេញទស្សនកិច្ចនៅអេហ្ស៊ីប លោក Erdogan និយាយថា ការចរចានុយក្លេអ៊ែរកម្រិតទាបនឹងធ្វើឡើងនៅប្រទេសអូម៉ង់នៅថ្ងៃសុក្រនេះ ។
ប៉ុន្តែលោកយល់ថា កិច្ចពិភាក្សានៅកម្រិតថ្នាក់ដឹកនាំកំពូលរវាងអាមេរិក និងអ៊ីរ៉ង់ នឹងមានប្រយោជន៍ជាងសម្រាប់ជំហានបន្ទាប់។
ទួរគី ដែលបានរក្សាទំនាក់ទំនងជិតស្និទ្ធជាមួយប្រធានាធិបតីអាមេរិក លោក ដូណាល់ ត្រាំ និងពង្រីកឥទ្ធិពលការទូតក្នុងតំបន់ កំពុងដើរតួនាទីយ៉ាងសកម្មដើម្បីបញ្ចៀសស្ថានការណ៍។
បញ្ហាប្រឈមចម្បង ទីក្រុងវ៉ាស៊ីនតោនទាមទារឱ្យបញ្ចូលបញ្ហាឃ្លាំងអាវុធមីស៊ីលរបស់អ៊ីរ៉ង់ទៅក្នុងកិច្ចចរចា ខណៈទីក្រុងតេហេរ៉ង់ប្តេជ្ញាពិភាក្សាតែលើកម្មវិធីនុយក្លេអ៊ែរប៉ុណ្ណោះ។
ភាពមិនចុះសម្រុងនេះបាននាំឱ្យមានការគំរាមកំហែងវាយប្រហារតាមផ្លូវអាកាសទៅវិញទៅមក និងការផ្លាស់ប្តូរទីតាំងកិច្ចប្រជុំពីទីក្រុងអ៊ីស្តង់ប៊ុល ទៅកាន់ទីក្រុងម៉ាស្កាតវិញ។
ទោះបីជាមន្ត្រីទាំងពីរភាគី បានយល់ព្រមផ្លាស់ប្តូរទីតាំងប្រជុំក៏ដោយ ក៏មិនទាន់មានសញ្ញាណាមួយបង្ហាញថា ពួកគេបានរកឃើញចំណុចរួមលើរបៀបវារៈនៃកិច្ចប្រជុំនោះទេ៕