ប្រធានាធិបតីសហរដ្ឋអាមេរិក លោកDonald Trump បានអំពាវនាវឲ្យប្រធានាធិបតីអ៊ុយក្រែន លោក Volodymyr Zelenskyy ចាប់ផ្តើមដំណើរការចរចាឲ្យបានលឿនជាមួយរុស្ស៊ី ដើម្បីឈានទៅរកកិច្ចព្រមព្រៀងសន្តិភាពដែលអាចកើតមាន។
ប្រភពពីសារព័ត៌មានAnadolu Agency នៅថ្ងៃទី១៤ខែកុម្ភៈ។
លោកTrump បានព្រមានថា ប្រសិនបើមិនផ្លាស់ប្តូរយុទ្ធសាស្ត្រទេ លោក Zelenskyy អាចនឹងខកខាន ឱកាសដ៏អស្ចារ្យមួយហើយបញ្ជាក់ថា រុស្ស៊ីកំពុងបង្ហាញចេតនាចង់ធ្វើកិច្ចព្រមព្រៀង។
ការថ្លែងនេះធ្វើឡើង ខណៈដែលរុស្ស៊ី និងអ៊ុយក្រែនបានបើកកិច្ចចរចាសន្តិភាពពីរជុំ ក្រោមការសម្របសម្រួលរបស់សហរដ្ឋអាមេរិក នៅទីក្រុង Abu Dhabi ប្រទេស United Arab Emirates ក្នុងខែមករា និងដើមខែកុម្ភៈ។ លទ្ធផលដំបូងគឺការយល់ព្រមលើការដោះដូរអ្នកទោសសង្គ្រាម ជាលើកដំបូងក្នុងរយៈពេលប្រាំខែ។
ស្របពេលនោះ វិមានក្រឹមឡាំងបានប្រកាសថា កិច្ចចរចាជុំបន្ទាប់នឹងត្រូវរៀបចំនៅថ្ងៃទី១៧-១៨ ខែកុម្ភៈ ខាងមុខនេះ នៅទីក្រុង Geneva ប្រទេស Switzerland ដែលត្រូវបានគេរំពឹងថា នឹងក្លាយជាជំហានសំខាន់មួយក្នុងការស្វែងរកដំណោះស្រាយសន្តិភាពរវាងភាគីទាំងពីរ៕