ស្ថានីយ៍រថភ្លើងកណ្ដាល នៅទីក្រុង Glasgow ដែលជាស្ថានីយ៍មមាញឹកបំផុតក្នុងប្រទេសស្កុតឡេន ។
ត្រូវបានគេរំពឹងថា នឹងបិទនៅថ្ងៃអង្គារ បន្ទាប់ពីមានអគ្គីភ័យធំមួយកើតឡើងនៅអគារជិតខាង។
អគ្គីភ័យនេះបានឆាបឆេះអគារបុរាណសម័យ Victorian នៅលើផ្លូវ Union Street និងបណ្ដាលឲ្យផ្នែកខ្លះនៃអគារដួលរលំ។
ប្រភពពីសារព័ត៌មានBBC នៅថ្ងៃទី៩ ខែមីនា។
តាមសេចក្ដីរាយការណ៍របស់ BBC អគ្គីភ័យបានចាប់ផ្ដើមប្រហែលម៉ោង ៣:៤៥ រសៀលកាលពីថ្ងៃអាទិត្យ នៅក្នុងហាងលក់ vape មួយ។
អ្នកដើរកាត់ម្នាក់ឈ្មោះ Lamin Kongira បាននិយាយថា គាត់បានឃើញភ្លើងតូចមួយឆេះក្រោមតុដែលមានឆ្នាំងសាក និងអាដាប់ទ័រច្រើន ហើយបានព្យាយាមពន្លត់វាមុនពេលភ្លើងឆាបឆេះពេញអគារ។
សេវាពន្លត់អគ្គីភ័យ និងជួយសង្គ្រោះស្កុតឡេនបានបញ្ជូនរថយន្តពន្លត់អគ្គីភ័យចំនួន៩គ្រឿង និងយានយន្តចំនួន ៣ គ្រឿង ដើម្បីគ្រប់គ្រងស្ថានការណ៍។ ខណៈនេះ ក្រុមអ្នកជួយសង្គ្រោះនៅតែបន្តប្រតិបត្តិការនៅកន្លែងកើតហេតុ៕