អ៊ីរ៉ង់ បានបើកការវាយប្រហារជាបន្តបន្ទាប់ លើហេដ្ឋារចនាសម្ព័ន្ធថាមពលដ៏សំខាន់ៗ នៅក្នុងរដ្ឋឈូងសមុទ្រ។
បន្ទាប់ពីអ៊ីស្រាអែល បានវាយប្រហារវាលឧស្ម័នធំបំផុតរបស់ខ្លួន កាលពីថ្ងៃពុធ ដែលជា ការកើនឡើងដ៏គ្រោះថ្នាក់ នាំឱ្យវិបត្តិកាន់តែធ្ងន់ធ្ងរឡើង និងធ្វើឱ្យតម្លៃប្រេង កើនឡើងខ្ពស់កប់ពពក!។
សារព័ត៌មាន ABC នៅថ្ងៃទី១៩.០៣.២០២៦។
ដើម្បីឆ្លើយតបទៅ នឹងការវាយប្រហារដំបូងរបស់អ៊ីស្រាអែល អ៊ីរ៉ង់បានចេញបញ្ជាជម្លៀសទ្រព្យសម្បត្តិថាមពលជាច្រើន នៅក្នុងប្រទេសកាតា អារ៉ាប៊ីសាអូឌីត និងអារ៉ាប់រួម។
ដោយនិយាយថា រោងចក្រទាំងនោះបានក្លាយជា “គោលដៅផ្ទាល់ និងស្របច្បាប់” នេះបើយោងតាមទីភ្នាក់ងារសារព័ត៌មាន Mehr ពាក់កណ្តាលផ្លូវការ។
ទាំងកាតា និងអារ៉ាប់រួម បានរិះគន់យ៉ាងខ្លាំងចំពោះការវាយប្រហារដំបូងរបស់អ៊ីស្រាអែល ។
ដោយរដ្ឋមន្ត្រីការបរទេសកាតា បានហៅវាថាជា “ជំហានដ៏គ្រោះថ្នាក់ និងមិនទទួលខុសត្រូវ ចំពេលមានការកើនឡើងនៃយោធា បច្ចុប្បន្ននៅក្នុងតំបន់” នៅក្នុងការបង្ហោះប្រព័ន្ធផ្សព្វផ្សាយសង្គម។
នៅក្នុងសេចក្តីថ្លែងការណ៍មួយ ក្រសួងការបរទេសកាតា បានថ្កោលទោសការវាយប្រហាររបស់អ៊ីរ៉ង់ផងដែរ ដោយហៅវាថាជា “ការកើនឡើងដ៏គ្រោះថ្នាក់ និងជាការរំលោភបំពានយ៉ាងធ្ងន់ធ្ងរ លើអធិបតេយ្យភាពរបស់រដ្ឋ ក៏ដូចជាការគំរាមកំហែង ដោយផ្ទាល់ដល់សន្តិសុខជាតិ និងស្ថិរភាពនៃតំបន់។
ក្នុងចំណោមការវាយប្រហារសងសឹក អ៊ីរ៉ង់ បានវាយប្រហារស្ថានីយឧស្ម័នធម្មជាតិរាវ (LNG) ធំជាងគេបំផុតរបស់ពិភពលោកនៅ Ras Laffan ក្នុងប្រទេសកាតា ដែលជាការវាយប្រហារដ៏ធ្ងន់ធ្ងរបំផុត លើរោងចក្រថាមពលរបស់ប្រទេស ចាប់តាំងពីការចាប់ផ្តើមសង្គ្រាម។
ការវាយប្រហារទាំងនេះ បានបង្កឱ្យមានអគ្គីភ័យ និង ការខូចខាតយ៉ាងទូលំទូលាយ នេះបើយោងតាមក្រុមហ៊ុនប្រេង និងឧស្ម័នដែលគ្រប់គ្រងដោយរដ្ឋ Qatar Energy។
យោងតាមក្រសួងការបរទេសអេមីរ៉ាតអារ៉ាប់រួម មីស៊ីលក៏បានកំណត់គោលដៅទៅលើទីតាំងឧស្ម័ន Habshan ក្នុងទីក្រុង Abu Dhabi ផងដែរ។
ក្រសួង បានសង្កត់ធ្ងន់ថា ការវាយប្រហារភេរវកម្មនេះ ដែលកំណត់គោលដៅទៅលើហេដ្ឋារចនាសម្ព័ន្ធ និងទីតាំងប្រេងរបស់ប្រទេសនេះ តំណាងឱ្យការគំរាមកំហែងដោយផ្ទាល់ដល់សន្តិសុខ និងស្ថិរភាពនៃតំបន់ និងប្រជាជនរបស់ខ្លួន ក៏ដូចជាសន្តិសុខថាមពលសកលផងដែរ៕