(ភ្នំពេញ)៖ អង្គភាពប្រឆាំងអំពើពុករលួយ បានបញ្ជូន ឧត្តមសេនីយ៍ឯក អ៊ុក ហៃសីឡា អគ្គនាយករងអន្តោរប្រវេសន៍ និង ឧត្តមសេនីយ៍ទោ សរ សំណាង ស្នងការរងរាជធានីភ្នំពេញ ព្រមទាំងជនសង្ស័យ២នាក់ទៀត ទៅតុលាការ នៅវេលាម៉ោង៤៖ ៣០រសៀល ថ្ងៃទី២២ ខែមេសា ឆ្នាំ២០២៦ ពាក់ព័ន្ធករណីស៊ីសំណូកពីពួក Online Scams និងសម្អាតប្រាក់..!។
នេះបើយោងតាម ឯកឧត្ដមទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលបានប្រាប់អង្គភាពព័ត៌មាន។
*ជនសង្ស័យ២នាក់ ដែលក្រៅពីលោកផ្កាយបី និងលោកផ្កាយពីរខាងលើ ទី១៖ អ្នកស្រី អស កូពិសី ភរិយារបស់លោក សរ សំណាង និងម្នាក់ទៀត ឈ្មោះ យ៉ាត កុសល ដែលពួកគេជាប់សង្ស័យរឿងស៊ីសំណូកពីក្រុម Online Scams និងសម្អាតសាច់ប្រាក់..!។
ការចាប់ខ្លួននគរបាលជាន់ខ្ពស់ខាងលើ ធ្វើឡើងជាបន្តបន្ទាប់ ចាប់តាំងពីថ្ងៃទី១៩ ខែមេសា ឆ្នាំ២០២៦។
បើតាមលោកទេសរដ្ឋមន្រ្តី ករណីនេះ ACU បានបើកប្រតិបត្តិការស៊ើបអង្កេត រយៈពេល២០ថ្ងៃ។
លោកបញ្ជាក់ថា ប្រតិបត្តិការ២០ថ្ងៃ នឹងបញ្ជាក់លម្អិត ក្រោយបញ្ជូនជនសង្ស័យទាំង៤នាក់ ទៅកាន់តុលាការរួចរាល់។
មួយរយៈពេលនេះ ACU បានចាប់ខ្លួនបុគ្គលសំខាន់ៗជាច្រើន ស្របពេលដែល រាជរដ្ឋាភិបាល បានដាក់ចេញនូវយុទ្ធនាការបង្ក្រាបបោសសម្អាត ឧក្រិដ្ឋកម្មតាមប្រព័ន្ធអ៉ីនធើណិត និងភាពអសកម្មនានា។
កាលពីខែមីនា អនុប្រធាន និងមន្រ្តីសាខាគយ និងរដ្ឋាករខេត្តកោះកុង ព្រមទាំងមនុស្ស២នាក់ទៀតត្រូវបានឃាត់ខ្លួន ដោយរកឃើញលុយពុករលួយជាង១លានដុល្លារ៕