មេដឹកនាំគណបក្ស France Unbowedរបស់បារាំង លោក Jean-Luc Melenchon បាននិយាយថា ទីក្រុងប៉ារីស នឹងចាកចេញពីអង្គការណាតូ ប្រសិនបើគាត់ក្លាយជាប្រធានាធិបតី។
ដោយអះអាងថា សម្ព័ន្ធភាពនេះបម្រើជាចម្បង ដើម្បីដាក់អឺរ៉ុប ឱ្យស្ថិតនៅក្រោមឥទ្ធិពលរបស់សហរដ្ឋអាមេរិក នេះបើយោងតាមប្រព័ន្ធផ្សព្វផ្សាយបារាំងនៅល្ងាចថ្ងៃសុក្រ។
សារព័ត៌មានAnadolu។
លោក Melenchon បានប្រាប់ប៉ុស្តិ៍ព័ត៌មាន LCI ថា“ប្រសិនបើខ្ញុំជាប្រធានាធិបតី បារាំង នឹងចាកចេញពីអង្គការណាតូ”ដោយបន្ថែមថា សម្ព័ន្ធភាពយោធា“បម្រើតែរឿងមួយគត់៖ ដាក់យើងឱ្យស្ថិតនៅក្រោមការត្រួតពិនិត្យរបស់សហរដ្ឋអាមេរិក”។
លោក Mélenchon ស្ថាបនិកចលនា France Unbowed (LFI) និងជាអ្នករិះគន់អង្គការណាតូ ជាយូរមកហើយ បាននិយាយថា ការរក្សាគម្លាតពីសម្ព័ន្ធភាពគឺជាផ្នែកមួយនៃ “ខ្សែបន្ទាត់ប្រវត្តិសាស្ត្រ”របស់បារាំង។
លោកក៏បានកត់សម្គាល់ ពីការដកខ្លួនរបស់បារាំង ចេញពីបញ្ជាការយោធារួមបញ្ចូលគ្នារបស់អង្គការណាតូ ក្រោមការដឹកនាំរបស់អតីតប្រធានាធិបតី Charles de Gaulle និងបានរិះគន់ការសម្រេចចិត្តរបស់អតីតប្រធានាធិបតី Nicolas Sarkozy ក្នុងឆ្នាំ 2009 ក្នុងការរួមបញ្ចូលប្រទេសនេះឡើងវិញទៅក្នុងរចនាសម្ព័ន្ធបញ្ជាការរបស់សម្ព័ន្ធភាព។
លោក Melenchon បាននិយាយថា “យើងនឹងបន្តមួយជំហានម្តងៗ”ដោយបន្ថែមថា បារាំងនឹងចាកចេញពីបញ្ជាការរួមបញ្ចូលគ្នារបស់អង្គការណាតូជាមុនសិន ហើយដកខ្លួនចេញពីកម្មវិធីឧបករណ៍យោធារួមគ្នាជាមួយកងទ័ពអាមេរិក។
ការកត់សម្គាល់របស់លោកបានកើតឡើងចំពេលមានការជជែកវែកញែកកាន់តែខ្លាំងឡើងនៅអឺរ៉ុបអំពីស្វ័យភាពការពារជាតិ ការចំណាយលើយោធា និងការពឹងផ្អែករបស់ទ្វីបនេះលើការធានាសន្តិសុខរបស់សហរដ្ឋអាមេរិក បន្ទាប់ពីភាពតានតឹងផ្នែកភូមិសាស្ត្រនយោបាយកាន់តែកើនឡើង៕