ប្រទេសចិន ប្រកាសថាខ្លួនបានសាកល្បងបាញ់មីស៊ីលយុទ្ធសាស្ត្រពីនាវាមុជទឹកនុយក្លេអ៊ែរដោយជោគជ័យ ទៅកាន់តំបន់មួយក្នុងមហាសមុទ្រប៉ាស៊ីហ្វិក។ ចិនអះអាងថា មីស៊ីលបានធ្លាក់ចំទីតាំងដែលបានកំណត់ ហើយការសាកល្បងនេះគឺជាផ្នែកនៃការហ្វឹកហ្វឺនយោធាប្រចាំឆ្នាំ។
ប្រភពពីសារព័ត៌មានAnadolu Agency នៅថ្ងៃទី៦ខែកក្កដា។
មុនការបាញ់សាកល្បង ចិនបានជូនដំណឹងដល់ប្រទេសមួយចំនួនក្នុងតំបន់ រួមមាន អូស្ត្រាលី នូវែលសេឡង់ និងជប៉ុន។ ទីក្រុងប៉េកាំងបញ្ជាក់ថា ការសាកល្បងនេះអនុវត្តស្របតាមច្បាប់អន្តរជាតិ និងមិនមានគោលដៅគំរាមកំហែងប្រទេសណាមួយឡើយ។
ការសាកល្បងនេះគឺជាលើកទី២ ចាប់តាំងពីចិនបានបាញ់មីស៊ីលផ្លោងអន្តរទ្វីប (ICBM) ចូលមហាសមុទ្រប៉ាស៊ីហ្វិក កាលពីខែកញ្ញា ឆ្នាំ២០២៤។
ទោះជាយ៉ាងណា ជប៉ុនបានសម្តែងការព្រួយបារម្ភយ៉ាងខ្លាំង និងបានអំពាវនាវឱ្យចិនពិចារណាឡើងវិញចំពោះការបាញ់សាកល្បងមីស៊ីលនេះ ខណៈប្រព័ន្ធផ្សព្វផ្សាយអូស្ត្រាលីរាយការណ៍ថា ចិនបានដាក់ពង្រាយនាវាតាមដានចំនួនពីរគ្រឿង ដើម្បីតាមដានការសាកល្បងនៅមហាសមុទ្រប៉ាស៊ីហ្វិក៕
